– Har det strålande i Tyrkia

I 21.30-tida fredag blei fleire bruer i Istanbul og Ankara stengt med stridsvogner. President Recep Tayyip Erogan meldte at det pågjekk eit kuppforsøk, mens offiserer sa at militæret hadde overtatt makta.

I løpet av natta og morgonen laurdag skal kuppforsøket ha blitt slått ned. Samtidig har norsk UD gått ut med åtvaring mot å reisa til Tyrkia. SAS, Apollo, Ving og Star Tour kansellerer alle reiser til Tyrkia laurdag, mens Norwegian flyr som normalt.

Sør i Tyrkia, i hamnebyen Oba 3 km aust for Alanya, er fleire osingar på ferie.

– Vi sat på ein restuarant i går då kuppforsøket starta. Det einaste vi merka var at dei tilsette følgte med på lokale nyhende, men dei såg ikkje spesielt uroa ut, seier Leif Idar Røen til Midtsiden.

Heller ikkje laurdag har dei merka noko.

– Det er lange avstandar frå kysten i sør til Ankara midt i landet og opp til Istanbul i nord. Vi såg norske nyhende på TV2 då vi kom heim i går, og i dag, og måten norsk presse skildrar tilstanden i Tyrkia er ikkje representabelt for slik vi turistar har det ved Antalya.

Ser fram til ein billig slutt på ferien

Mens media fortel om at folk tømer minibankane i panikk var det ingen i minibankane då Leif Idar gjekk for å eta lunsj i dag.

– Men eg ser jo at Liren har stupt i verdi, så det blir ein billig slutt på ferien for vår del, seier øen og ler.

I fjor haust kjøpte han og kona Gunn Nåmdal Røen ein ferieleilegheit i anlegget Renda Park, 300 meter frå stranda.

Dei har hatt venepar med seg som har reist heim og nye har kome ned.

– Folk vi har møtt på stranda, nordmenn på chartetur, skal ha fått beskjed om å halda seg ved hotellet. Eg forstår ikkje kvifor, livet ser ut til å gå sin vante gang elles.

– Vi har heller ikkje høyrd noko frå flyselskapet vi reiser med, så vi reknar med at vi nyter denne siste av tre veker og reiser heim som planlagt laurdag og ei veke.