Har du blitt oppringt av «Microsoft»?

Ei rekke gongar dei siste fem åra har osingar fortalt om oppringingar frå nokon som utgjev seg for å vera frå kundesupport hos Microsoft.

Les òg: – Stupid woman!

Spesielt i 2012 og 2013 var dette problem mange fortalte om eller rapporterte til politiet, men også i 2014 og 2015 har det vore oppringingar til innbyggarar i Os.

– Eg blei oppringt tre gongar berre i desember. Nummeret dei ringer frå er ifølgje opplysinga eit utanlandsk nummer som ligg skjult, fortel Tor Slettebakken.

– Dei lurer ikkje meg, men eg synest det er greit å åtvara andre. Eg synest dessutan det er underleg at ikkje det går an å forfølgja desse, at dei kan halda på i årevis.

Mønsteret er det same; dei seier det er oppdaga problem med datamaskina di og ber deg skru på maskina og lasta ned eit program dei sender deg. Om du bit på får svindlarane kontroll på pc-en din og tilgang til mange personlege opplysingar, inkludert passord, som dei kan bruka til å svindla deg.

– Vi ringer ikkje til kundane våre

Politiet si oppmoding er klar, får du denne typen oppringing, legg på!

På Microsoft sine facebooksider opplyser selskapet at dei aldri ringer sine kundar eller brukarar med mindre det er avtalt på førehand.

Dei ber brukarar som har blitt oppringt om å registrera informasjon i dette skjemaet på microsoft sine heimesider.

«Har du blitt kontaktet setter vi stor pris på om du kan rapportere svindelforsøket. Vi trenger deres hjelp for å få bukt med problemet! Ikke gi ukjente tilgang på din datamaskin eller sensitiv informasjon om deg.»

Kjenner du nokon som kanskje ville blitt lurt av ei slik oppringing? Del denne informasjonen!