– Har du ikkje sjampisbord?
To produktive interiørdamer frå Bergen er blant utstillarane på hyttemessa på Sandsli.
Bildeserie:
Laurdag starta Hyttemessen 2017, som osingen Robert Nøss arrangerer på Quality Hotel Edvard Grieg.
Blant utstillarane er importør Reinhardt Østrem og MX Sport frå Os - og to rimeleg nystarta interiørdamer frå Bergen.
– Vi driv nettbutikk og satsar på den røffe, rustikke hyttemarknaden. Noko produserer vi sjølv, andre varer får vi produsert i Noreg eller importert, fortel Marianne Stokke og Britt Hege Karlsen frå byOhDeer.
Eit eige bord for champagneflaska, eit anna, heimelaga bord av ein trestubbe - og ein unik, hollandsk kombinasjon av bålpanne og barbeque, står i utstillinga.
– Det er lite utval for hytteeigarar på Vestlandet, med mindre dei vil ha det same på hytta som heime, seier dei to gründarane, nøgd med starten på messa.
Fekk napp i boblebadet
To andre utstyrs- og møbelseljarar er Jacuzzi Import AS frå Bergen og Reint Tre AS frå Valdres.
– Vi sel eigenproduserte heiltremøblar og tetningsstoff til laftehytter. Vi har hatt bra med folk innom standen i dag.
Jacuzzi-seljar Anette Flatøy byr på utandørsbobler frå 100.000 til over 200.000 kroner.
– Det går vanlegvis unna eitt eller fleire bad på ei messe. Eg har ein reservasjon allereie, og ser fram til søndagen, og til båtmessa neste helg.
– Fantastisk for oss
Mange av utstillarane er tomte- eller hytteseljarar. Blant dei er Eikås Hytter & Hus.
– Denne messa i Bergen er fantastisk for oss. Det er passeleg med folk så vi rekk å få ein skikkeleg prat med dei fleste, utan å føla at folk står i kø og ventar på informasjon.
– Det hender vi signerer kontrakt på hytter på messa, den gir oss uansett noko å jobba vidare med, seier Ole Skredegård og Ole Dag Meland.