Jone Karin P. Walde, Irish Dulay og Filip Gnerek har jobba i fleire veker for å førebu seg til Moldova-aksjonen (foto: Andris Hamre)

Har jobba i tre veker for Moldova

Elevane i klassa for kvardagsliv har jobba i fleire veker med å førebu Os VGS sin Moldova-aksjon. Måndag sto dei på stand for å selgje kaker og kort.

Av: Andris Hamre

Medan dei andre elevane ved skulen har nytta helga og måndagen til å gå med bøsser for å samla inn penger til «Hjelp Moldova», har elevane i klassa for kvardagsliv brukt fleire veker på å førebu aksjonsdagen.

– Vi har bakt pepperkakar, også nokre som står på pinne, vi har laga syltetøy, kort og tova julehjarter, fortel Filip, Jone og Irish medan dei står på stand på Amfi Os for å selgje varene til inntekt for aksjonen.

Kjekt å få hjelpa

På spørsmål om kva som var kjekkast å laga er dei tre samstemde.

– Det var å baka pepperkakar.

– Men kvifor gjer de dette då?

– Det er fordi vi vil hjelpe dei i Moldova. Det er fint å få hjelpa dei som Hans Bjørn Bakketeig og dei andre hjelper, fortel dei tre.

450 elevar i sving

Det er sjette året elevane ved Os vgs støttar «Hjelp Moldova» gjennom skulen sin humanitære aksjon. I fjor samla dei inn 147.000 kroner til organisasjonen. Elevane har gjennom helga og måndagen gått rundt med bøsser, eller arbeidd for bedrifter eller privatpersonar. Dei vil også ha onsdag 14. desember som ein aksjonsdag.

Fått sjå med sjølvsyn

Tre elevar og to tilsette ved skulen har sjølv fått sjå arbeidet til organisasjonen på nært hald.

I oktober var nemleg dei på besøk i Moldova i fire dagar og fekk vitja ein barnehage for psykisk utviklingshemma, synssenteret, eit kvinnefengsel, ein institusjon for psykisk utviklingshemma og ein rekkje av familiar som lider nød som følgje av at fleire eller alle i familien er blinde eller synshemma.

– I ein storfamilie på 13 personar, var 11 av dei blinde eller synshemma. Frå bestefar til barnebarn. Dette er ein familie som lever i stor naud og som ikkje klarar seg uten hjelp. Denne hjelpa får dei av «Hjelp Moldova» og frivillige, heiter det i informasjonsfolderen frå skulen.

«Hjelp Moldova» starta i 1993 og har møtt mykje motstand gjennom åra, men fekk eit gjennombrot i vår då dei opna det nye synssenteret, mykje takka vera midla frå skulane i Os, Fusa og Bergen. Ved opninga var mykje av det offisielle Moldova til stades.

Les òg: Arbeider i medvind

Fleire saker