Har oppretta sak etter at bil hamna i sjøen

Laurdag i 12.20-tida kom det melding om bil i sjøen i Os hamn. To personar hamna òg i sjøen, men kom seg uskadde på land.

Uhellet skjedde i samband med sjøsetjing av ein båt på slippen til Oselvarlaget i Hamnevegen.

Eit vitne fortel at dei uheldige sjøsetjarane på førehand hadde uroa seg over at handbremsen på bilen ikkje fungerte, noko som normalt ikkje er eit problem, så lenge nokon sit i bilen og trør inn fotbremsen.

– Begge var ute av bilen då båten byrja å dra bilen med seg i sjøen, fortel politioverbetjent Anne Lyssand.

Dei hadde lagt steinar bak hjula, som kompensasjon for manglande bremsar, men det var ikkje nok.

– Ingen av dei er mistenkte for promillekøyring, og begge blåste til null. Men det er oppretta sak for å undersøkja om dei handla uaktsamt.