Har plass til «alle» som vil filma seg sjølv

I august 2017 kom ORBO, Ole Reinert Berg-Olsen, med «Here She Comes», hans første nye låt på to år.

– Låten låg tre veker på Viral 50 Norway på Spotify. Eg trur det er første gong eg har hatt ein låt inne på den lista, men så veit eg heller ikkje om dette var ei greie sist eg gav ut nytt materiale, seier Ole til Midtsiden.

I slutten av februar i år kjem neste singel, «Road to Riches».

– Den handlar ikkje nødvendigvis om materialistisk rikdom, men å vera på veg til eit mål, på veg til lykke.

Før singelen blir sleppt håper ORBO å vera godt i gang med produksjon av musikkvideo til låten, ein video der han vil klippa saman av det han håper skal bli tett med innsendte bidrag.

Bak rattet eller opp ein bakke?

I går la ORBO via Facebook ut invitasjon der han ba folk senda inn video av seg sjølv mens dei køyrde bil.

– Om dei sit bak rattet i ein bil eller ein båt, eller er på veg opp til ein fjelltopp eller joggar langs vegen, har ikkje så mykje å seia. Eg vil ha korte snuttar, anten det er 2 sekund eller 20 sekund, av folk som er i rørsle.

– Korleis kom du på ideen?

– Eg var nyleg på ferie i Dubai, og der blei eg filma mens eg køyrde bil. Og så tenkte eg, det er jo mange som filmar seg sjølv i desse Snapchat-tider, kanskje eg kan samla mange ansikt i same video.

– Kor mange har du plass til?

– Mange! Låten blir på rundt fire minutt, og om eg får inn mange bidrag så blir videoen ekstra bra, med nokre sekund til kvar.

– Vêr varsam!

ORBO understreker at han IKKJE oppmodar folk om å filma seg sjølv med handhalden mobil mens dei køyrer.

– Bruk eit stativ, eit GoPro-kamera eller ein kamerat til å filma, tryggleiken kjem først!

Om du er ein av dei som vil bidra så ber Ole deg senda videoen i HD, altså i full storleik.

– Eit godt verktøy er WeTransfer.com, der treng du verken å laga konto eller logga deg inn, det er berre til å lasta opp sida så kjem nedlastingslink direkte til mail@orbo.no.

Kort tid etter at han tysdag ettermiddag la ut invitasjonen kom dei første spørsmåla frå interesserte som ville senda inn.

– Det er i grunnen ingen reglar, eg håper folk er kreative, og at bidraga kjem i løpet av dei to neste vekene, seier ORBO.

-

Vil du vera med i ein musikkvideo? ORBO, Ole Reinert Berg-Olsen, har plass til ALLE! #orbo #orbomusic #casting #musicvideo #midtsiden #selfie #travel

Et innlegg delt av Midtsiden.no (@midtsiden) Jan. 31, 2018 at 3:02 PST