Har signert ny spiss

Os Fotball fortel i dag at dei har signert toårsavtale med angrepsspelar Anders Myking Waagan.

Han blir skildra som rask, mobil og målfarleg.

Waagan vaks opp i klubben Ravn, gjekk til Aalesund i ungdomen og fekk eit innhopp i Eliteserien mot Odd i september 2017.

Han skåra 13 mål for Spjelkavik i 2019 og går no frå Fyllingsdalen til Os.

For Fyllingsdalen skåra han i år 8 mål på 24 kampar, inkludert reduksjon til 2-1 mot Os på Kuventræ.

Med 8 mål i 2022 tangerer han Os-spelar Niklas Lunde Fosen (8 mål på 16 seriekampar) og ligg eitt mål bak ein annan av dei nye lagkameratane sine, Henrik Tysse Sperrevik (9 mål på 26 kampar).

– Anders er ein spelar vi kjenner godt frå kampar mot Fyllingsdalen, seier Os-trenar Endre Brenne til si eiga Facebook-side.

– Han har også gjort eit veldig godt inntrykk på oss gjennom treningsopphald no etter sesongslutt.

Var lagkamerat med Braut-en

Waagan hadde 15 kampar for Norge G16 i 2016 .

Året etter fekk han 12 kampar for G17-landslaget.

Begge åra var han lagkamerat med blant andre den komande superspissen Erling Braut Haaland.

I 2016 skåra Waagan 2 mål på 15 kampar med landslaget, Braut Haaland skåra 1 mål på 17 kampar.