Nore Neset/Os i første kamp i årets Norway Cup. (Foto: Vidar Hjelle for Midtsiden)

Hardt straffa for administrativ mangel

Norway Cup: Superjentene til Nore Neset/Os starta cupen med eit brak. Så kom sjokkbeskjeden frå arrangørane.

Av: Kjetil Vasby Bruarøy

2003-årgangen til Nore Neset/Os tok seg til finale i Norway Cup i fjor og slo NM-vinnarane i KM-finale seinare same sesong.

I år har dei starta Norway Cup, sesongens høgdepunkt, med 8-0-siger i begge dei første innleiande rundane.

Men måndag kveld blei 16-0 endra til 0-6 i målforskjell og null poeng. I staden for å kjempa om puljesiger tysdag morgon er dei allereie plassert i B-sluttspelet.

Mens hovudtrenar Ørjan Sandal, og dagleg leiar i Os Fotball, Endre Brenne, var opptatt - fekk vi ei forklaring frå jentefotballansvarleg i Nore Neset/Os, Kine Lunde, og Morten Døsen og Jan Frode Skeie (som òg er sportsleg leiar i Os Fotball) i jentene sitt trenarteamet, 

– Fekk godkjent dispensasjonssøknaden i mai

Årsaka til at dei to første kampane blei omgjorte til 0-3-tap er bruk éin spelar som ikkje hadde rett til å spela. Bruk av inntil to overårige spelarar er lov, men ikkje dersom vedkomande har spelt i sin eigen eller høgare aldersnivå i løpet sesongen.

• Omtalt i Norway Cup sitt reglement paragraf 3-5.2:

– Vi har to overårige spelarar, og søkte om dispensasjon, som vi fekk godkjent 28. mai i år.

Laget stiller, med unntak av to andre spelarar (som ikkje er overårige), med same tropp som i fjor.

– Regelen er omformulert i år, og vi hadde ikkje notert i søknaden at éin av desse to har spelt seniorfotball i år.

Søknaden, som Nore Neset/Os ikkje hadde trengt å senda om ikkje det var noko å søkja dispensasjon om, blei altså godkjent. Men på mangelfullt eller feil grunnlag.

– Svært uheldig

Mangelen blei oppdaga i alderskontroll etter andre av tre innleiande rundar måndag i 12-tida. Avgjerda blei fatta i 20-tida måndag kveld. På same tid blei tabellen endra, og fleire spelarar og foreldre oppdaga poengtrekket via nett før trenarane fekk informert om avgjerda.

Kvelden har gått med til møte med spelarar og foreldre, og innsats for å få eit møte med administrasjonen i Norway Cup.

– Ved sidan av den svært triste situasjonen for jentene, som er heilt uskyldige i denne saka, er det veldig uheldig at dette blei oppdaga først etter at andre kamp var spelt. Om avgjerda blir ståande har dei ikkje sjanse å kvalifisera seg til A-sluttspelet.

– Hadde det blitt oppdaga tidlegare så hadde dei dei hatt sjanse til, med eller utan denne spelaren, å kjempa om nok poeng til likevel å delta i A-sluttspelet.

Speler uansett éin kamp til

Sjølv om håpet om A-sluttspel no er ute, og det som skulle vera oppkøyring til toppkamp i pulja i kveld blei oversvømt av tårer og frustrasjon, har jentene bestemt seg for å spela kampen tysdag morgon.

Å spela B-sluttspel kan bli sett på som sportsleg, men samtidig usportsleg.

– I prestasjon har jentene vist at dei også i år høyrer heime i A-sluttspelet. Derfor synest jentene sjølv at det blir som å ta nokon andre sin plass om dei skal spela vidare i eit B-sluttspel. Men dei vil uansett stilla i den siste av dei tre innleiande rundane, seier trenarteamet.

Fleire saker