Øyarevyen 2019

Hardtslåande lokalrevy

«Denne revyen har de laga sjølv - me skal berre gjenfortelja han».

image
image
image
image
image
image
image
image
image
image
image
image
image
Av: Kjetil Vasby Bruarøy

Laurdag blei «Øyarevyen» spelt for tredje år på rad, for to fullsette salar (2 x 100 gjestar), klokka 17 for barnevaktane, klokka 20 for alle som var klare for fest utover natta.

• Bildeserie og video: Frå dør til dør for å fleipa med folk (2018)

Gjengen i Øyane treng ikkje dela ut lyskespark oppover i gangane på rådhuset for å vera morosam, dei har plenty med naboar å ta av.

– Denne revyen har de laga sjølv, men skal berre gjenfortelja han, innleia Asbjørn Austevoll då han ønskte velkomen.

I fjor gledde revyhønene frå «Nor og Ne», Susan Askvik og Linda Nytræ, seg over at sketsjane var morosame sjølv om om du ikkje hadde heile bakteppet.

I år var revyen kanskje endå meir lokal, og hakket tøffare med dei som fekk unngjelda.

Fyldige sketsjar

Fire sketsjar før pause og fire etter høyres kanskje ikkje så fyldig ut, men fleire nummer varte ei stund. Heldigvis. Kvar historie hadde fleire gode poeng, kanskje med unntak av asfaltgjengen, og hadde fleire overlappar i handlinga.

Tittelen blei avslørt i det revyen var i gang, Facebook-gruppa «Aktivt i Øyane» fôrar revygruppa med mykje materiale. Dei kreative eldsjelene bruker teknologien flittig i fleire nummer, og opningsintervjuet, som gjorde at Hugo Hansen fekk bidra også i år, gav ein forrykande start.

Så kom ein sketsj om manglande oppmøte på dugnad, overlappa til litt galskap med eit skaft og vidare til kvifor det bur så mange utlendingar i ein leilegheit i nabolaget. Og kvar alle kattane blir av.

Med eige trash-cam

Vaksne og endå eldre fotballspelarar på Øyglimt sin innsats, og oppmøte, blei parodiert mens dei var i intervju med underteikna - og så var det vekstbedrifta Samba Marin sin tur. Kvifor har arvingen Emil slutta, og veit han kva ein muldvarp er?

Ei blanding mellom parodi og hyllest til HM Johnsen blei siste nummer før pause. Diskusjon om vikeplikt på Bruarøy, etterfølgd av Øyane sitt trach-cam og kven som kjem på banen om du set bosset på feil plass.

Har du ein lang CV, men ingen jobb? Fekk du asfalt i fjor? Og kvifor er det eit rosa helikopter i Øyane? Det fekk gjestane svar på. I ruta over ser du eit kort utdrag av revyen. Kanskje kjem vi med ein utvida video til helga. Eller ei anna helg. (Artikkelen er med vilje publisert samtidig som United-kamen byrjar, så ikkje internettlinjene til Øyane skal bli varme).

Skodespelarar; Asbjørn Austevoll, Christer Røttingen, June Strønen Halhjem, Robert Bøthun, Hugo Hansen (video), Andreas Årvik og Evy Renate Fyllingen. Nykomar i fjor, Ann-Christin Heggland, var ikkje med i år, og var erstatta av Marius Vedholm Aasen. Også Aasen viste talent, både i skodespel og song, ikkje minst overbeviste han i rolla som Emil T. Brimsholm.

Med i revygruppa er framleis Gunn Austevoll og Dorthea Garvik (sminke) og Kristian Bruarøy og Kari Marie Austevoll Lyssand (lyd og lys).

Fleire saker