Heftigaste til no

Torsdag 29. desember entra ACS scena i Oseana på sin "West Side Of The Wall"-tour. Vel 300 hadde løyst billett før konserten byrja. Til samanlikning hadde fredagens konsert på Ricks seld 115 då konserten byrja torsdag kveld.

- Dei fortel at dei er strålande nøgd med salen og billettsalet, fortalde Oseanadirektør Kim Kristoffersen før konserten.

Og fornøgd blei også publikum.

- Dette var heilt rått.

- Så utruleg bra. No fekk eg inspirasjon til eit møte eg skal ha i morgon, fortalte ein av tilhøyrerane på veg ut.

Heftig

Noko av det som var med på å gjera konserten heilt rå var eit lysshow det ikkje har vore makan til i Oseana så langt. Med ei diger trapoline på høgkant som lerret og lyskastarar i massevis fungerte Oseanasalen til fulle som konsertarena av denne typen.

- Desse tek vi gjerne eit nytt besøk av, skreiv Oseanadirektøren på facebook etter konserten.

Lyden satt som eit skudd heile konserten.

Dårleg løysing

Det som ikkje fungerte like bra var serveringa av drikke før konserten. Berre to i baren for å betjene dei vel 300 gjestane er for liten.

- Kvifor gjer dei ikkje som i Grieghallen og har nokon som berre står og tappar, medan andre ekspederer kundane, undra ein av dei øltørste gjestane før konserten.

- Grunnen til at vi berre har ein bar og sal kun før konserten er at dette er ein "sittekonsert" kor vi nyttar amfiet, forklara Kristoffersen.

Diverre såg det ut som om det var fleire som hadde fått i seg nok likevel, om ein skal døme etter flyginga ut og inn under konserten, noko som etterkvart blei nokså forstyrrande for dei med litt større festblære.

Ny sjanse

I kveld er det ny konsert i Oseana med Romjulsblues med Yngve & His Bootie Legs og Vetrehus Bluesband. Då reknar vi med at serveringa glir betre med fleire barar.

- Under Romjulsbluesen er det flatt gulv med barar også inne i Oseanasalen, avsluttar Kristoffersen.