Held kurs i psykososial førstehjelp

Os Røde Kors og Fusa Røde Kors arrangerer kurs i psykososial førstehjelp.

Kurset er ein del av flyktningeaktivitetane i samband med ankomst frå Ukraina.

– Kurset er på norsk, for ukrainarar og innbyggarar i Bjørnafjorden som er i kontakt med flykningar, fortel Kristian Strønen frå Os Røde Kors.

Det er kurs i Kolskogen torsdag 21. april og i Fusa samfunnshus måndag 25. april.

Kurshaldarar er Ida Smørdal frå Fana Røde Kors og Lena Bekken frå Os Røde Kors.

Praktiske råd for god omsorg

Korleis skal du best hjelpa nokon som har opplevd noko rystande?

Røde Kors fortel om fire prinsipp for for psykososial førstehjelp:

1. Å vera nær
2. Å lytta på ein merksam måte
3. Å akseptera ulike reaksjonar
4. Å gi omsorg og praktisk hjelp

Blant underpunkta på dei fire er å avpassa augekontakt, å gi korte og tydelege beskjedar og å ikkje lova noko du ikkje kan halda.

Utanom dei fire punkta kjem eit eige kapittel om det å hjelpa barn i kriser.

Blant råda er å vera tydeleg (sei heller at nokon er død enn at dei er borte), å veta at barn ofte treng å høyra det same fleire gongar og å fortelja barna at du ikkje ventar at dei skal ta vare på deg eller ein annan vaksen.

Råda er utarbeidde i samarbeid med Regionalt ressurssenter om vold, traumatisk stress og sjølvmordsforebygging RVTS Øst.

På rodekors.no kan du lesa meir om psykososial førstehjelp.