Hellfuck til Os igjen

Bildeserie:

1 av 3

«Lokale» Bjørn Hellfuck er det nokon som skriv. Hellfuck frå Bergen/Os, skriv andre. Vokalisten bak maska er frå Bergen kommune. Men ein av musikarane i det maskerte bandet med dei grove tekstane er frå Os.

- Eg kjente han frå før, men visste ikkje at det var han som kalla seg Bjørn før eg kjente igjen armen hans på eit bilde. Eg ringte for å få mistanken min stadfesta. Etter ei stund nemnte han at det var ein ledig plass i bandet, og frå mars har eg vore med, fortel osingen «Ronny Rettholt».

Fredag om ei veke er dei samla i Os for å spela konsert på Bar2Be.

Anonym
Alle i bandet til Bjørn har som hovudpersonen både maske og kallenamn. Rettholt vil verken ut med namnet sitt eller kva instrument han spelar.

- Det ein del som veit kven vi er, men eg trur dei forstår at maskene og anonymiteten er ein del av opplegget vårt, og respekterer det. Fleire av oss er aktive med andre band, og då er det OK om vi kan driva med dette anonymt. Det handlar ikkje berre om grove tekstar, men om det å sleppa å bli bedt om å spela Hellfuck-låtar når vi er på jobb med andre.

Les òg: Trynefaktro uten tryne (BT.no)

Frå uhørt til mediefavoritt
Då Midtsiden.no intervjua Bjørn Hellfuck før konserten hans i Os i mai i år, var vi blant dei aller første til å spørja om musikken og mannen bak maska. Trass i at Hellfuck hadde neste alle dei øvste plassane på Urørt-listene. Søkte du på namnet hans på Urørt fann du han faktisk heller ikkje.

- Det var noko av det eg la merke til, så suveren på NRK Urørt, så lite nemnt i media. Men no er alle interesserte, Bjørn får store oppslag i avisene i Bergen, i magasinet til Dagbaldet, i VG og i FHM. Vi har også vore på Waschera på TV 2, fortel Rettholt.

VG-lista og Grieghallen-konsert
I vår måtte Hellfuck oppretta to ekstrakonsertar i Bergen, same kveld. Konsert nummer tre blei utselt eit kvarter før konsert nummer to starta.

- På to månadar selte vi ut fire konsertar på Garage. Det har også vore mykje folk på konsertane våre i Trondheim, Stavanger, Oslo, Stord og Førde, seier osingen «Ronny Rettholt».

I sommar kom Bjørn med sjølvfinansiert album, i haust har kom han med fleire nye låtar og i går gjekk «Krabbeklo» rett inn på 11. plass på VG-lista topp 20 single uke 49. Framfor blant anna Miley Cyrus og Alicia Keys. Dei ligg i tillegg på 5. plass på Topp 10 norsk single.

- Før jul kjem songhefte med tekstane i og i februar skal vi blant anna spela konsert i Grieghallen. Vi har fleire andre store oppdrag på gong, seier Rettholt, som ikkje vil røpa alt utan å konferera med sjefen Bjørn.

Hellfuck på tysk
Kor tid det kjem eit album nummer to er førebels uvisst, men det første albumet skal relanserast. I tillegg skal Hellfuck erobra Tyskland.
- Ein del av låtane er til omsetjing no. Tyskarane liker norsk musikk og dei liker låtar som er lette å synga med på. Eg trur det kjem til å funka bra, seier «Ronny Rettholt».

Men først skal han, Bjørn og resten av hellfuckane synga jula inn på Bar2Be 11. desember.

Under bilda kan du sjå Bjørn Hellfuck på Waschera på TV 2 i oktober i år.
«Krabbeklo» er blant dei snillare låtane.