Henta to forsvarsspelarar frå Fyllingsdalen

Lysekloster er i rute med stallen til årets sesong, og hadde i starten av førre veke 15 signerte spelarar. Men frå førre sesong har dei mista måljeger Even Vetås, kaptein og back Nikolai Harris og den erfarne midtstopparen Denis Ljubovic.

No står nye krefter klare til å overta kampen om plass i forsvarsrekkja, den offensive og erfarne backen Ronny Rojas (28) blei offentleggjort tysdag, midtstoppar Audun Øvrelid (23) i dag - begge frå Fyllingsdalen.

Rojas har hatt ungdomstida si på Brann sitt akademi før han hadde fleire sesongar i Varegg. I tillegg er han ein ivrig futsal-spelar. I fjor spelte Rojas 27 kampar for Fyllingsdalen og skåra 7 mål.

– Eg signerte med Lysekloster fordi eg har høyrd mykje bra om klubben, ikkje minst frå bestekameraten min, Simen Næss, seier Ronny ifølgje Lysekloster si Facebook-side.

Frå Hødd og Herd til bergensfotballen

Øvrelid spelte på Hareid før han fekk tre sesongar for Hødd, i hovudsak Hødd 2, og kom via Herd (som kom på 3. plass i Lysekloster og Os si pulje i 2017) til Fyllingsdalen.

Han seier han ønskjer å spela for eit lag med ambisjon om opprykk, og at han har likt seg på trening med Lysekloster.

I fjor spelte Øvrelid 17 kampar for Fyllingsdalen, i alt har 23-åringen over 140 kampar i 3. divisjon bak seg.

• Her er Lysekloster sine treningskampar i vinter