Henta gliset heim

Med godt mannskap blei det ein trygg og lærerik seglas for Tord Søfteland før 17. mai. Laurdag la han frå land i Dunkerque, onsdag kveld klappa Søfteland til kai ved Os Sjøfront med sin Jeanneau Sun Odyssey 44 DS.

Han brukte berre 10 liter diesel på turen frå Dunkerque nord i Frankrike til Os i Noreg. Dieselen blei brukt til straumproduskjon via motoren.

– Vi segla heile vegen. Det var også meininga, eg ville bli kjent med båten, seier Søfteland.

– Derfor var eg opptatt av å få med meg godt mannskap, legg han til.

God erfaring

Bjarne Bak, Øyvind Skarstein og René Paulsberg var med på turen.

– Bjarne har vore med på fleire store regatta, han lærte eg mykje av.

– Øyvind har også god erfaring med segling og yngstemann René, sonen til kjærasten min, blei kalla RTFM, Read The F... Manual.

– René las heile manualen og sette seg veldig godt inn i instrumenta og styringa av heile det elektroniske anlegget.

– Det var Vidar som lokka

Tord er frå før aktiv som mannskap om bord i Sigbjørn Paus sin Merelle på tysdagsseglasa til Os Seilforening.

– Eg er mykje med og seglar, men det er lenge sidan eg hadde seglbåt sist. No var tida moden, og då Vidar i fjor kjøpte seg ein Jeanneau Sun Odyssey 44 DS så slo eg til på same båt.

I mai var osingane til Tord Søfteland og Vidar Øvstedal sine eksklusive seglbåtar ferdig produsert, i Frankrike.

– Det var rundt 100.000 kroner å spara på å henta båten sjølv framfor å transportera den med lastebil, så valet blei enkelt og reisa blei ein god start med den nye båten.

Vidar med mannskap kom heim 15. mai, Tord 16. mai. Då hadde dei segla langs kysten frå Dunkerque i Frankrike forbi Belgia og Rotterdam via Haugesund for bunkring og direkte vidare til Os.

Til tur og havregatta

Søfteland fortel at turen heim blei fin, men variert og litt tøff.

– Vi har opplevd sluddbyger, storm og 15 meter høge bølgjer.

– Båten tok bølgjene veldig fint, einaste gong det var vått på dørken bak i cocpiten var då det regna.

Men Tord har ikkje plan om å bruka den nye båten til seglas innaskjers.

– Eg har kjøpt den for i reisa på tur. Dette er ein draum som går i oppfylling.

– Men det kan bli nokre lengre regatta, som Shetland Race, legg han til.

Onsdag kveld sat ein liten velkomstkomité og venta på Mobergsneset. Gjengen kom heim til 17. mai og båten fungerte veldig bra.

Du kan lesa meir om den romslege båten på jeanneau.com.