Måndag har Endre Brenne sin første arbeidsdag på Kuventræ, i november byrjar han å trena med A-laget. (Foto: Kjetil Vasby Bruarøy)

Hentar Island-proff

Etter fire år som proff på på Island kjem Endre Brenne tilbake til Os som spelar og spelarutviklar i fulltidsengasjement.

Av: Kjetil Vasby Bruarøy

Før 2010-sesongen kom tidlegare Norheimsund-spelar Endre Brenne frå Lillehammer til Os for å spela i 2. divisjon. Etter nedrykket same år gjekk turen vidare til proff-karriere på Island.

– Eg var ikkje heilt nøgd med sesongen min i Os. Eg spelte mykje fram til eg blei skadd, og fekk med meg dei siste kampane. Men det er aldri kjekt verken å mista mange kampar eller å rykka ned, seier Brenne.

No gjer han comeback på Kuventræ.

Til cupfinale

På Island var Brenne med å spela Selfoss opp igjen på øvste nivå, sesongen etter var han kaptein.

– Vi rykte dessverre ned igjen, men eg skifta til ein større klubb, FC Keflavik, og blei verande på øvste nivå.

Keflavik landa på 8. plass i serien, men tok seg heilt til cupfinalen. Den gjekk Brenne glipp av.

– Eg fekk eit brot i ankelen då eg landa etter ein hovud-duell i siste seriekamp før cupfinalen, som vi dessverre tapte 2-1 på overtid.

– Akkurat det vi treng

I perioden etter skaden har Endre vore heimom i Strandebarm. Der fekk han besøk av sin tidlegare trenar gjennom halvannan sesong i Norheimsund, Lars Bakkerud.

– Vi har halde kontakten desse åra og då han viste interesse for å få meg til Os så passa det i grunnen veldig bra. Eg har no fått oppleva å vera fulltidsspelar i utlandet, eg har lært mykje og eg er klar for å utvikla meg også som trenar, seier Brenne.

Bakkerud seier han vil bruka Brenne sine eigenskapar både på og utanfor banen.

– Eg kjenner Endre godt og eg hugsar då han kom frå Strandebarm til Norheimsund med stor lærevilje og gode haldningar.

– Han er ein leiartype og det er akkurat det vi treng i laget. Det er bra at Os har skåra 10 mål meir enn neste lag i avdelinga i år, men vi har også sleppt inn heile 57 på 23 kampar. Det ville ikkje skjedd om vi hadde nok leiarar på banen, sterke, rutinerte spelarar som jobbar saman med å styra laget.

– Sånn det har vore i år så har vi trudd at det er farleg å leia 3-0 og så sleppa inn eitt mål. Den som snakkar mest til medspelarane sine er vår gode, 18 år gamle keeper. Vi treng fleire sterke stemmer på banen.

Får fleire roller på Kuventræ

Ved sidan av å koma inn som ein styrke til A-laget skal Brenne få fleire trenarrelaterte oppgåver.

– Endre skal vera del av trenarteamet til A-laget og han får hovudansvaret for Telenor Xtra, fotballfritidsordninga, der han har sin første arbeidsdag måndag, fortel Bakkerud.

På Island har Brenne, på fritida frå Keflavik, vore med som assistent og trenar for ulike yngre lag, ned i 7-årsalderen.

– Island er kjent for å, trass det låge folketalet, fostra mange gode spelarar. Kva er dei gode på?

– I hovudsak så trener dei mykje og dei har mange trenarar rundt unge lag. Seksåringane på Island trener fire gongar i veka og til å leia seg så har dei ikkje ein tilfeldig far, men fleire dyktige trenarar som held intensiteten oppe og gir tilbakemeldingar gjennom heile økta.

– Eg ser også at det er fleire eksempel på at Island er ein god stad for unge Tippeliga-spelarar med lite speletid på norsk toppnivå. Det har vore danske og norske benkeslitarar som etter kort opphald på Island har kome tilbake og spelt frå start, eller blitt selt til større klubbar på kontinentet.

Sjølv vil han helst til Os.

Nye idear og klare mål

– I starten på november reknar eg med å vera frisk nok i foten til å byrja å trena med ball og eg ser veldig fram til både å treffa gamle lagkameratar igjen og til å jobba saman med Lars med dei yngre i klubben.

– Vi har allereie fleire idear og planar for tida som kjem, tiltak og tilbod som spelarane kan sjå fram til, blant anna eit fritidstilbod for ungdom med ekstra fotballinteresse.

– Og så skal vi rykka opp til 2. divisjon neste år, seier Endre Brenne med eit sjølvsikkert smil.

Fleire saker