Hentar kryssar i Honningsvåg

I dag startar Morten Tøsdal med mannskap turen frå Honningsvåg til Os i ein nykjøpt kryssar på 69 fot. - Det er kjekt å ha plass til litt folk, seier Morten.

Kjetil Vasby Bruarøymandag 27. sep. 2010 08:27

- Eg var i Honningsvåg og såg på båt for nokre år sidan, og ba folk i området varsla meg om det skulle dukka opp ein kryssar som skulle setjast ut av fiske. Då denne nyleg dukka opp var det berre å slå til, seier Morten Tøsdal.

Morten har «vakse opp i båt» og kjøpte si første snekke før han blei konfirmert.

- Han fekk kalesje til snekka i konfirmasjonsgåve, fortel pappa Olav, som har fått lov til å bli med på turen frå Honningsvåg til Os i den nye kryssaren til sonen.

Rutinert reiar - fersk skipper
Morten har hatt fleire snekker opp gjennom åra og farta rundt i ein kutter på 60 fot før han kjøpte kryssaren han og kameratane no er for å henta heim til Os.

- Kutteren ligg no for sal. Kryssaren er 9 fot lengre, men rett under 50 bruttotonn, fortel han.

Båten er så stor at du treng fritidsskippersertifikat (D5L) for å føra den.

- Vi tok sertifikatet i vinter, seier Morten på vegne av seg sjølv og to av matrosane, faren Olav og kameraten Joakim.

Går døgnet rundt
Båten blei bygd på Vestnes i 1955 og har ein Caterpillar på 408 hesterefter. Marsjfarten er på 8-9 knop.

- Vi har planar om å gå på skift for å halda båten i drift mot Os døgnet rundt, i alle fall i starten.

Dei reknar med å vera heime i Os om 5 til 7 dagar, om vêret er bra nok.

- Kvifor kjøpa ein båt på 69 fot til fritidsbruk?

- Det er greit å ha god plass, anten du skal på ferie eller på festival. Denne har køyplass til 10.

- Det blir nok mange fine turar framover, både her på Vestlandet og kanskje ein tur til Austlandet og over til Sverige, seier Morten om den nyaste investeringa hans.