Fiskaren tok kontroll over båten då han tok ungdomar for tjuveri frå teine. På land sto politiet og tok imot dei. (Foto: privat/Kjetil Vasby Bruarøy)

Her blir hummartjuvane taua til land

Fiskaren var handlekraftig då han tok ungdomar på fersk gjerning.

Av: Kjetil Vasby Bruarøy

Måndag kveld, på veg heim etter å ha drege sine eigne teiner, såg ein hummarfiskar frå Os ein båt som vekte mistanke.

– Dei fleste drar teinene sine i dagslys, her var det tre ungdomar i ein liten båt, utan lanterner, fortel hobbyfiskaren.

Fiskaren skrudde av lysa, køyrde taktisk langs land for å unngå å laga silhuett i speglinga av måneskinet, og kom brått på dei tre ungdomane.

Med teine og hummar om bord

Ungdomane hadde akkurat fått ei teine om bord då dei blei overraska av fiskaren. Teina tilhøyrer ein annan fiskar og det var hummar i teina.

– Dei påsto at dei drog andre sine teiner for å sjå om det var rognhummer i teinene. I så fall ville dei kasta hummaren uti.

– Som om eg beit på at tre ungdomar bruker kveldane som sjølutnemnd kystvakt, det blir jo som å bryta seg inn hos folk for å leita etter tjuvgods.

Fiskaren tok tak i tauet i baugen og slepte båten med ungdomane til land mens han ringte politiet og eigaren av teina.

Opprettar ikkje sak

Politiet rykte ut og møtte fiskaren og dei tre ungdomane i hamna ved Oseana.

– Vi har snakka med ungdomane og med foreldra deira, fortel politioverbetjent Audun Hadler-Olsen.

Han vil ikkje kommentera forklaringa til ungdomane, eller om det er mistanke om større omfang av hummartjuveri.

– Etter samtale med partane har vi bestemt at det ikkje blir oppretta sak.

Kan bli meldt likevel

Fiskaren som serverte tjuvane på sølvfat seier han er litt overraska om politiet ikkje har sjekka brygga til ungdomane, for å sjå om dei har samla opp større mengder hummar.

– Eg har sjølv blitt fråstolen to humrar som eg hadde i samleteine. Eg hadde heldigvis nettopp tømt samleteina og selt 24 stykk. I ettermiddag skal eg dra teinene mine og då er eg spent på om teiner manglar eller om det er spor etter tjuveri.

– Om noko er vekke er det mogleg at eg melder gutane sjølv.

– Truleg fleire tjuvar

Fiskaren som eig teina som gutane hadde i båten har inntrykk av at tjuveri frå teiner er eit omfattande problem.

– Det er jo lett å mistenka dei som allereie er tatt, men det kan fort vera fleire som held på å dra andre sine teiner. I fjor var det heilt Texas, i år har eg mista ei teine, men fangsten har vore betre og det har vore nokre færre teikn på at andre har drege teinene før meg.

Teikn på tjuveri kan vera at teina er vekke, at den er flytta på, at lokket er ope eller at alt agnet er ete opp, men at teina er tom. Set du teina grunt kan leppefisk ha ete agnet, sto den djupt, kan nokon ha stole fangsten din.

– Eg bur sånn at eg har utsikt over moloane, og eg kjenner folk som har nattkikkert. Vi er fleire som kjem til å følgja nøye med i vekene som kjem, åtvarar han.

Fiskaren har lite sans for dei som dreg andre sine teiner.

– Det er mykje jobb med å driva hummarfiske, både med å få tak i agn og å setja og å dra. Då er det utruleg irriterande at andre berre går og forsyner seg. Dei får skaffa seg nokre teiner og gjera jobben sjølv, det tar tid, men det er både kjekt og spennande.

Les òg: Kystvakten tok beslag i 17 teiner

Fleire saker