Hilda Feste bisett i dag
I ei kvitpynta Os kyrkje tok osingane farvel med 98 år gamle Hilda Rød Feste (98). Både barn og barnebarn minna mor og bestemor.
Venar og familie tok eit verdig farvel med Hilda Rød Feste fredag ettermiddag.
- Hilda fekk mange gode år. Vi skulle ønska av heile vårt hjarta at ho skulle ha avslutta livet på ein annan måte, opna forrettende prest Knut Ivar Askeland minneorda om Feste.
Askeland fortalte om Feste som ei dame glad i å treffa folk, diskutera og ei kvinne med omtanke for alle rundt seg.
- For Hilda var det viktig at andre følte seg vel og velkomen, oppsummerte Askeland.
Helsing frå oldebarna
Både dotter og barnebarn minna ei varm, hjelpsam og trygg mor og bestemor.
- Du var snill, men samstundes streng. Når eg i ungdommen blei obstanasig kunne du bli sint på meg, men du ville berre gje meg ein god oppdraging.
Dottera kunne fortelja at dei allereie hadde snakka om å feira 100-årsdagen i Oseana.
- Du hadde livslysta og livsgleda til det, sjølv om du hadde byrja med noko nytt, nemleg å kvila frukost no i haust, minna dottera.
- Eg minnast kveldsmaten nede hos deg med lyst brød og ekte meierismør, fortalte barnebarnet.
- Sjølv då eg blei større kunne eg ikkje gå å legga meg før eg hadde vore hos deg og sagt godt natt.
Ho fortalte om ei bestemor som sette stor pris på familien og etterkvart oldebarna når dei kom til.
- "No skine da", kunne ho seia når eg og ungane kom på besøk.
Barnebarnet avslutta minneorda med ei helsing til oldemor frå dei to oldebarna.
Varm takk til alle
På vegne av familien takka prest Knut Ivar Askeland alle som har sendt helsingar og varme tankar til familien i den tunge stunda etter første nyttårsdag.
Også i kyrkja var det helsingar og blomar frå naboar, venar, familie og organisasjonar Feste hadde vore ein del av gjennom det 98 år lange livet hennar.
Bisettinga blei følgt av vakker musikk framført av Helge Haukås på trompet og Gina Aspenes på vokal.
Jobbar med dei same tinga
Politiadvokat Ørjan Ogne fortel til Midtsiden fredag ettermiddag at dei ikkje har gjort noko gjennombrot i etterforskinga.
- Vi jobbar med dei same tinga som tidligare i veka, med informasjonsinnhenting, systematisering av informasjon og analyser av denne, seier Ogne.