Talentkonkurranse - oktoberfest i Os

Hjartevarm talentkonkurranse

Dei var ikkje mange, men dei var gode, deltakarane på laurdagens talentkonkurranse i Os.

image
image
image
image
image
image
image
image
image
Av: Kjetil Osablod Grønvigh

Som ein del av årets oktoberfest hadde arrangørane invitert til talentkonkurranse for born og unge i storteltet som i helga var rigga i Os sentrum. 

Til å vera jury hadde dei fått med seg kultur- og sportsfirkløvaren Eirik Søfteland, Patricia Langeland, Mats Cato Moldskred og Martine Frotveit Johnsen.

Etter ei kort kort helsing frå leiar av Os sentrumsforening, Jeanett B. Kallekleiv, fekk medarrangør Kristin Moesgård den kjekke jobben med å leia publikum gjennom det som skulle bli ein time med flotte, lokale talent i mange sjangrar.

Som to dråpar vatn

Først ut var dei sju år gamle bestevennane Olivia Laupsa Buvik og Olina Hjertnes Halhjem.

Slåande like i både utsjånad og klesveg song dei saman låta «Engler i Sne» av eMMa.

Dommar-Eirik tykte det heile var veldig, veldig bra, og han la vekt på at ikkje berre såg dei like ut, dei bevegde seg likt òg.

Dommar-Martine la til at ho tykte jentene var både søte og kjempeflinke, og at dei burde halda fast på draumen om å bli popstjerner.

Imponerande mjuk dans

Neste ut på scenen var sju-og-eit-halvt år gamle Alexandra Georgieva, som skulle visa fram rytmisk sportsgymnastikk.

Mjuk som ein katt hausta ho stor applaus frå både dommarar og publikum.

Fagdommar innan dans, Patricia Langeland, hylla Alexandra både for talent, og ikkje minst kor bra ho handterte den noko begrensa plassen ho hadde til rådvelde på scenen.

Dommar-Mats Cato kunne ikkje anna gjera enn å innrømma at så mjuk kom han aldri til å bli.

Ein musikalsk pilot

Saksofon er kanskje ikkje det hippaste instrumentet i musikkverda, men gje det til ein gut med halvlangt hår og hettegenser, og du får 12 år gamle Sebastian Føleide.

Konferansier Moesgård kunne fortelja at Sebastian har ein draum om å bli pilot, og på fritida vekslar han mellom å øva på saksofonen og fly med flysimulator heime på guterommet. 

I «kvardagen» spelar han saksofon i Nore Neset skulekorps, laurdag skulle han tolka Christina Aguilera sin «Beautiful».

Og vakkert vart det.

Eirik meinte at Sebastian lett kunne gjera som Iron Maiden sin vokalist, Bruce Dickinson, nemleg både driva med musikk og vera pilot. 

Eirik meinte òg at låtvalet var både modig og velspelt.

Mats Cato meinte på si side at Sebastian burde satsa på saksofonen framfor å bli pilot. 

Sterk song og dans

Sjetteklassingane Katrine Carmora Vaktdal og Erle Bøe Lunde fekk ein litt trøblete start på sitt innslag, då teknikarane starta feil song. Men fekk det noko å seia for innsats og innleving? Nei. 

Med Rihanna sin «Stay», vakkert sunge av Katrine, fekk publikum sjå ein sterk og innlevande dans av Erle. 

Eit samla dommarbord var einige om at dei jo jentene på imponerande vis utfylte kvarandre, og at dette ville dei gjerne sjå meir av. 

Sa WOW! til Mie Kristine

Siste deltakar ut var åtte år gamle Mie Kristine Artnzen.

Mie Kristine hadde òg vald å framføra eMMa si låt «Engler i Sne», noko som gjorde det heile ekstra spennande - og sikkert vanskelegare for dommarane. 

Eirik hylla Mie Kristine for god stemmekontroll, mens Dommar-Martine ikkje hadde meir å seia enn WOW!!!

Og vinnaren er ...

Etter ein kort pausen kor dommarane diskuterte seg fram til vinnarenn fekk publikum høyra den eine dommaren, Martine, framføra låta «Sideshow».

Då juryen samla seg framfor scenen var stemninga til å ta og føla på - kven kom til å stikka av med sigeren?

– Dette var vanskeleg, men vinnaren er Sebastian. Du gav oss gåsehud, kunne Eirik endeleg avsløra. 

Eit par konsertbilattar til Oseana og gåvekort frå Os sentrum rikare måtte Sebastin pakka opp att saksofonen på ny - alle vinnarar får spela låta si to gongar. 

 

 

 

 

 

 

 

 

Fleire saker