Hjorten blei påkøyrd her på Byvegen, mellom Rema og Gymnasvegen. (Arkivfoto: KVB)

Hjort påkøyrd ved Os Gymnas

– Vi har hatt tre påkøyrslar siste veka, fortel jeger og ein av dei som driv ettersøk i Os, Espen Andersen.

Av: Kjetil Vasby Bruarøy

Måndag morgon i 7.30-tida blei ein hjort påkøyrd på Byvegen, mellom Rema 1000 og Gymnasvegen.

– Bilen var skadd i fronten, hjorten stakk vidare, fortel politioverbetjent Rune Fimreite.

Ein av dei som driv med ettersøk i Os, jeger Espen Andersen, fortel at hjorten blei funnen.

– Den blei funnen død ikkje så langt unna, på nokre bakkar mellom vegen og Os Gymnas.

– Hjorten vandrar frå Banktjørn-området og opp til Botnevik sine bakkar, men dette er første påkøyrsle i dette området på ei stund.

Tre påkøyrslar på éi veke

I førre veke åtvara forsikringsselskapet Gjensidige om at vi frå no og fram til jul er i høgsesong for påkøyrsle av vilt.

– I Bergen har dei hatt to for dagen nesten kvar dag i ein månad. I Os har vi no hatt tre på ei veke. Førre var på Ulvenvegen ved Kloppamyra, den blei funnen og avliva, fortel Andersen.

Hugs å merka staden, og at det er påbode å varsla politiet, om du køyrer på ein hjort. Kollisjon med vilt fører ikkje til bonustap på forsikringa, og du treng ikkje betala eigenandel, ifølgje Gjensidige.

 

Fleire saker