Hoggorm på tidleg vårtur

Bildeserie:

1 av 1

Vi har fått ein vinterferie med påskevêr i Os i år. I helga har det vore 8-10 gradar og sol, og vêret skal halda seg tørt og varmt til og med fredag, med unntak av fare for nokre dropar i morgon.

Ein av fleire som tok seg ein fjelltur søndag, var Dag Fjellanger.

– I periodar går eg mykje på tur, men dette var faktisk første tur på Liafjellet i år, fortel Dag.

Han blei overraska over møte med ein hoggorm midt på stien.

– Eg var på veg ned på nordsida, og hadde akkurat passert Havretjørn og bekken nedanfor. Ormen var ganske stor, 55 til 60 centimeter, og ganske treig. Den var truleg ikkje heilt vaken frå vinterdvalen enno.

Hoggormen ligg normalt i hi frå september-oktober og fram til april-mai, men på Vestlandet kan den koma ut av hiet tidlegare, allereie i februar. Førre helg skreiv Os & Fusaposten om ein hoggorm som var observert i ei grøft langs stien til Svartavatnet, nedanfor Lyshorn.

– Det er ikkje ofte eg møter hoggorm, dette er andre eller tredje gong. Eg observerte ein familie som gjekk 150 meter framfor meg, og synest det er rart dei ikkje såg den. Samtidig kan det vera greit å vera klar over at den no er ute, at folk trør varsamt, seier Fjellanger.

Hoggorm er ein av tre slangar som lever fritt i Noreg, og den einaste som er giftig. Hoggorm er freda.