Neste april blir det fire seremoniar i Oseana. Innfelt f.v.: Lorentzen, Johanessen og Skorpen. (Foto: Kjetil V. Bruarøy/privat)

Human-etisk rekord i Midthordland

Då fristen gjekk ut 1. oktober var det påmeldt 100 ungdomar til humanistisk konfirmasjon.

Av: Kjetil Vasby Bruarøy

Alle ungdomar som ønskjer det kan velja humanistisk konfirmasjon, uavhengig av eige eller familien sitt livssyn, også dei som ikkje ønskjer å bli medlem i Human-Etisk Forbund.

Konfirmasjonskurset oppmuntrar til sjølvstendig tenkning og refleksjon over etiske problemstillinger. Viktige tema er livssyn, humanisme, kritisk tenkning og menneskerettar.

Frå 2018 til 2019 auka mengda humanistiske konfirmanter i Midthordland frå 62 til 85. 

– Denne auka syntest vi var fantastisk, fortel styreleiar Solfrid Skorpen.

– Vi blei overvelda då vi i oktober såg ei yttarlegare auke, seier nestleiar Iselin Johanessen.

Fristen til å melda seg på kurs for konfirmasjon i 2020 gjekk ut 1. oktober. Då hadde 100 ungdomar meldt seg på.

8 kurs og 4 seremoniar 

Det blir fire seremoniar i Midthordland i 2020, alle i Oseana.

Tre av dei er laurdag 25. april, den fjerde blir dagen etter.

Før den tid skal ungdomane på kurs. Det er sett opp sju kurs i Os og eitt i Fusa.

Gode tilbakemeldingar

– Evalueringa frå foreldra i fjor, viser at dei er svært nøgde med både kurs, kursleiarar og seremoni. Konfirmantane sjølv har kome med veldig gode tilbakemeldingar på kursleiarane òg.

– Even har fått beskjed om at han er veldig lett for ungdomen å prata med, og Veronika blir rangert som «verdas beste» av ungdomane, fortel kursansvarleg Thomas Lorentzen.

Human-Etisk Forbund Midthordland får selskap av fleire nye kurshaldarar i komande sesong. Helga 16. og 17. november skal dei på opplæring i Bergen.

– Dei får òg oppfølging og vegleiing gjennom kursperioden, fortel Lorentzen.

Fleire saker