Sport | 02. okt. 2013

Hummar-kapplaup i Lysefjorden

Kven er flinkast å fiska hummar – musikaren ORBO eller ordførar Terje Søviknes?

F.v.: Ole Reinert Berg-Olsen, Terje Søviknes og Søviknes sin svigerbror, Erik Larssen. (Foto: Kjetil Vasby Bruarøy)
Kjetil Vasby Bruarøy
Kjetil Vasby Bruarøyonsdag 02. okt. 2013 13:21

I går starta årets hummarfiske, i dag fekk fiskarane sesongens første fangst.

Musikar Ole Reinert Berg-Olsen var nøgd då han for halvtanna år sidan fekk seg ny båt, og etter ein sommar med ivrig krabbefiske prøver han seg no på edlare fangst.

– Eg spurde Terje om råd, men han fortalde meg berre nokre få ting som eg visste frå før, fortviler musikaren, blant anna kjent for hyllest-låta "Heim til Os".

– I morgon skal eg søren meg følgja etter han, ler Ole etter å ha blitt grundig slått første fangstdag.

14-2

Ordførar Søviknes, som har fiska hummar sidan han gjekk i barnehagen, er framleis registrert som fiskar og kan driva aktivt med fleire enn dei 10 teinene hobbyfiskarar har lov til.

Les òg: Fekk fanget fullt (Søviknes sitt hummarfiske i 2010)

– Eg fiskar med 22 teiner og er nøgd med dagens fangst, etter å ha fått 16 humrar om bord.

To av dei var med rogn og gjekk rett ut igjen.

– Første fangstdag i fjor var om lag på same nivå, men då var halvt om halvt med rogn. Eg håper det er tilfeldig at eg berre fekk to med rogn i dag.

ORBO fiska med ti teiner, spreidd frå Os hamn til Lysefjorden, og fekk to humrar.

Stødig svoger

Vi møtte ORBO og Søviknes på brygga til ordføraren etter at dei to hadde drege og sett ut igjen alle teinene for i dag.

På brygga var også Terje sin svigerbror, Erik Larssen, også han ein ivrig hobbyfiskar etter hummar.

– I fjor fekk eg 14 humrar på 10 teiner første dag. I dag blei det halvparten, men det er bra det òg.

I tillegg til dei 7 kasta han uti to med rogn.

For varmt i sjøen?

John Lepsøy er blant fleire som fiskar rundt Os hamn.

– Eg hadde fem teiner uti og fekk éin hummar utanfor den eine moloen, fortel John.

– Det har visst ikkje vore så voldsom fangst, eg har prata med ein del som har fått 2-3 humrar og ein som har fått 8, fortel han.

Ein av fiskarane han har snakka med nemnte at det framleis er litt varmt i sjøen, og at hummarane held seg i ro visst det ikkje er kaldt nok.

– Kanskje det tar seg opp utover i november, seier Lepsøy.

Les òg: Fekk blekksprut i hummarteina

Alle fiskarane reagerer på at det står svært tett med teiner, ikkje berre i Os, men rundt Halhjem, Øyane, Strøno og i Lysefjorden.

Spennande? Vil du ha ukas høgdepunkt i innboksen?

Bli medlem du også!

Di støtte gir liv til lokalavisa vår.

  • Tilgang til alt innhald
  • Utan bindingstid
  • Fra 36 kr/uke
Se priser

Abonnementet blir fornya kvar måned. Du kan seia opp kor tid du vil, og blir då ikkje belasta for neste periode.