Hoggorm. (Ill. foto: Christina Forstrønen Bruarøy)
Hoggorm. (Ill. foto: Christina Forstrønen Bruarøy)

Hund (65 kg) kollapsa etter hoggormbitt i nabolag

– Utruleg overraskande at det er hoggorm i Sollia, seier lokal slange-entusiast.

Kjetil Vasby Bruarøy
24. juli 2018 - 11:19

Laurdag formiddag skulle Lisbeth Høgmo på løpetur med ein av familien sine hundar. Ho og ektemannen Kjell Arne har fire vaksne hundar av den ruvande rasen grand danois, i tillegg til eit kvalpekull på seks.

– Det er travle dagar for tida, og endå travlare når vi no har fått ein pasient i hus, seier Lisbeth.

Familien bur i Sollia og Lisbeth og den eldre tispa Sophia hadde berre kome nokre meter opp i vegen før hunden skar ut i grøfta og kollapsa.

– Dette var i krysset mellom Sollia og Kuvågvegen. Eg såg ikkje ormen, men vi har i ettertid funne både hol etter bittet og fått konstatert at hunden har alle symptom på hoggormbitt.

Å få med seg ein meir eller mindre bevisslaus hund på 65 kilo til veterinær er ikkje enkelt, men heldigvis for Lisbeth var ektemannen heime og kunne koma med bil for å hjelpa.

– Sophia var innlagt til søndag kveld. No er ho heime, veldig prega, heilt utslått og med tydelege smerter. Ho klarer ikkje ein gong å gå utan at vi støttar ho. Hunden må overvakast 24 timar i døgnet, så vi går på skift her mellom små og store hundar.

– Det raraste eg har høyrd

Hundeeigaren er glad for at det ser ut som om Sophia har fått hjelp og vil bli betre.

Dette er den same hunden som for to år sidan blei råka av ein veterinærtabbe, der gassbind blei gløymd igjen inne i hunden.

– Ho har vore uheldig nok no, synest eigar.

Samtidig undrar ho seg over at det er hoggorm i det ganske tettbygde nabolaget Sollia. Hunden, som har ei skulderhøgd på heile 84 cm, blei dessutan biten i olbogen.

Lokal slange-entusiast og hoggorm-kjennar Morten Rasmussen har mange eksotiske slangar heime, og har i fleire år følgd med på hoggormstammer i Os. Han bur i Brothaugen i Kuvågen, nær Sollia, og synest òg at det er svært overraskande at det er hoggorm i dette nabolaget.

– Det er det raraste eg har høyrd! Eg har hatt heile barndomen min i skogane i Kuvågen og aldri sett orm. Det einaste eg har høyrd er at det, for over 20 år sidan, skal ha vore observert hoggorm i skogen på Kuhnle.

– Det er kanskje mogleg at det har vore ei lita stamme i Greidalen ved Kuhnle, og at all gravinga i samband med Ohara-utbygginga har sendt desse hoggormane på flukt opp mot bustadfelta, seier Morten.

– Det er jo òg andre alternativ, at ein orm har tatt seg frå Liafjellet over E39, eller at ein fugl har prøvd å ta den, for så å mista den i Sollia.

– Kan tørken ha spelt inn, at ormen søkjer nytt terreng?

– Kanskje. Hoggorm held seg i stor grad på same plass, bortsett frå når den skal para seg, eller om den blir skremt vekk. Men det er mogleg at den flyttar meir på seg no når vi har hatt ein lang peride med varme og det har blitt uvanleg tørt i terrenget.

Fleire hundar skadd same dag

Då Høgmo var inne med hunden sin var det ein av tre hundar med same symptom same dag.

Veterinær Eva Kristin Lunde ved Os Dyreklinikk seier det ikkje er uvanleg på denne årsida.

– På denne årstida kjem det jamt og trutt inn folk med hundar som er biten av orm. Vi har ikkje statistikk som seier at det er fleire i år enn elles, men med finare vêr er det gjerne fleire som går på tur, og sjansen for at nokon blir bitne aukar.

– Stor eller liten, du veit ikkje på førehand kva hund som blir dårleg av bitt og kven som klarer seg bra. Hunden kan gå i sjokk og døy, å koma raskt til behandling kan vera avgjerande. Hundar kan òg få seinskader som nyresvikt om dei ikkje får behandling.

Typiske bittstadar er nase, leppe og fot.

Flått kan òg vera farleg

Om det å bli biten av ein orm verkar skummelt, er Lunde like opptatt av at hundeeigarar prøver å unngå at hunden blir biten av flått.

– Noko med det viktigaste hundeeigarane gjer på denne tida av året er å bruka middel mot flått.

– Hundar kan, som menneske, bli smitta av borreliose via flåttbitt, ein sjukdom som ofte tar med seg mange ekle symptom.

Les meir om

Lokal Helse Jakt og fiske