Laurdag klokka 09.10 stoppa politiet ein bilist ved på Lepsøyvegen ved Hagavik Hjemmebakeri.
– Vi sjekka vedkomande for promillekjøring og utandingsprøven gav utslag.
– Bilføraren, ein mann på rundt 40 år, er meldt for promillekjøring, fortel politibetjent Sangolt frå Os lensmannskontor.
Slo bulk i forbipasserande bil
Laurdag midt på dagen fekk politiet melding om ein episode mellom ein turgåar og ein bilist.
– Ein mann som gjekk på tur med ein hund skal ha slått eller sparka i bilen medan den kjørte forbi.
– Det blei bulk i bilen og det oppsto ein krangel etterpå, før hundeeigar gjekk frå staden.
Patruljen har seinare vore og sett etter turgåaren utan å finna han, men har godt signalement og ventar at skadeverket blir meldt måndag og at saka blir følgt opp.
Etter det Midtsiden kjenner til skjedde episoden i Mobergslia. Turgåaren, som blei funnen av slektningar av bilføraren, skal ha forklart at han slo bilen fordi han trudde bilføraren skulle kjøra på hunden hans. Turgåaren skal ha nekta å oppgje namn til bilføraren.
El-retur og vanskeleg gjest
Klokka 08.30 laurdag morgon fekk politiet melding om at folk dreiv og rota i el-retur-varene utanfor Elkjøp på AMFI Os igjen.
Då politiet kom fram var vedkomande vekke.
I 01.30-tida natt til søndag fekk politiet melding om vanskeleg gjest på Solsiden.
– Vaktane kontakta oss då dei fekk problem med ein som var uønskt på staden. Gjesten hadde blitt vist ut av lokalet, og klagde over smerte i arm og skulder.
– Vi gav vedkomande pålegg om å fjerna seg frå staden, fortel Sangolt.