Erlend Lyssand, Anne Lyssand, Inglaug Brimsholm og Andris Hamre gler seg over finaleplassen og håper folk stemmer Brit fram. (Alle foto: Kjetil Vasby Bruarøy)
Erlend Lyssand, Anne Lyssand, Inglaug Brimsholm og Andris Hamre gler seg over finaleplassen og håper folk stemmer Brit fram. (Alle foto: Kjetil Vasby Bruarøy)

Hyllar eldsjela Brit Eirin Tungeland

Frå i dag kan du stemma: – Eg kjem ikkje på nokon som fortener det meir.

Kjetil Vasby Bruarøy
14. desember 2019 - 11:48

Av over 500 nominerte blei Brit Eirin Tungeland frå handballgruppa til Os Turnforening plukka ut som Hordaland sin representant, ein av 17 kandidatar til å bli kåra til årets ildsjel under idrettsgallaen på Hamar 4. januar 2020.

Måndag 2. desember blei ho overraska av NRK, Norges Idrettsforbund og ein flokk av idrettsvenar i Os med beskjed om at ho er blant 5 finalistar.

Juryens begrunnelse: Den nominerte har bidratt sterkt med å få barn og psykisk utviklingshemmede inkludert i idrettsmiljøet. Med over 50 års engasjement i idrettslaget med utallige verv, har den nominerte vært sentral i å utvikle og tilrettelegge håndballmiljøet, hvor hun spesielt er opptatt av at alle skal bli sett, og at de får en sosial tilhørighet.

• Frå i dag 14. desember kan du stemma på din kandidat på idrettsgalla.no.

Du kan berre stemma éin gong, og berre fram til 31. desember.

Vi har snakka med fire personar frå idrettsmiljøet i Os som kjenner Brit godt; dei tidlegare lagvenninnene Inglaug Bromsholm og Anne Lyssand, tidlegare leiar i både Os Turn Handball og NHF Region Vest, Andris Hamre, og tidlegare Os-spelar, no Fana-trenar Erlend Lyssand.

Sterk og omsorgsfull på både fotball- og handballbanen 

I 1976 starta Hordaland fotballkrets med damefotball. Os meldte på eit lag som blei både seriemeister og kretsmeister. På laget spelte blant anna dei to handballspelarane Inglaug Brimsholm og Brit Eirin Tungeland.

– Brit Eirin var enormt sterk, ho var usedvanleg god i forsvar og ein tøff strekspelar i handball. På fotballbanen spelte ho sentralt, og ho hadde blant anna ei skåring frå midtbanen på graset på Kuventræ, minnast Inglaug.

Tre år seinare rykte dei opp til øvste nivå i norsk handball saman.

– Ved sidan av å vera ein sterk og tøff spelar, viste ho alltid omsorg for alle. Eg veit ikkje om nokon som fortener denne prisen meir enn Brit Eirin, seier Inglaug.

– Du kunne spørja ho om alt

Anne Lyssand er 12 år yngre enn Brit. Ho var 15 år då ho i 1976 byrja å spela handball, og var med på opprykk og eit år i 1. divisjon før ho flytta vekk på skule.

– Brit var ikkje berre ein fighter og eit forbilde, ho tok seg av alle når vi var på turar saman, såg til at alle hadde det bra før og etter kamp.

– Og så var ho veldig kunnskapsrik. Du kunne spørja ho om alt frå reglar til motspelarar, ho visste kven som var på landslaget og kva eigenskapar dei hadde.

Like flink med alle 

Erlend Lyssand vaks opp i Furulunden, som nabo til Oshallen, og var ofte med foreldra og såg kamp. Seinare har han spelt på gute- og herrelag, trent damelaget til Os og er no trenar for Fana sitt damelag på øvste nivå.

– Brit har vore ei inspirasjonskjelde for meg både som spelar og trenar. Ho var tøff og allsidig som spelar, og har eit vesen som gjer at ho passar like godt med dei aller yngste som med vaksne, seier Erlend.

– Sjølv om ho seier ting på ein fin måte, så er ho tydeleg. Du får lyst til å yta av folk med eit sånt vesen og eit sånt engasjement.

Erlend seier han sjølv har tenkt på Brit som god kandidat til denne prisen, og vil takka dei som nominerte ho.

– Heile Handball-Noreg bør stemma på Brit

Andris Hamre flytta til Os i 2000, byrja å spela på herrelaget i 2003 og blei valt til leiar i 2007. Frå 2014 var han leiar i handballregionen.

– Eg blei først kjent med Bri som trenar for HU-laget, som ho hadde saman med ei anna eldsjel, Grete Søviknes.

Hamre la merke til at Brit engasjerte seg på fleire nivå, òg i periodar då ho ikkje hadde nokre formelle verv. Ho stilte på årsmøte med positive innspel og glødande engasjement, ho starta mini-handball, som på fleire måtar var ein forgjengar til dagens AFO og FFO, og ho stilte ivrig opp på gutehandballdagen, då den blei etablert.

– Brit har betydd mykje for rekrutteringa til handballen, og til trivselen til veldig mange.  Eg blei veldig glad då eg høyrde at Brit var nominert, og då ho seinare blei plukka ut som finalist.

– No håper eg at heile Hordaland og heile Handball-Noreg stemmer Brit fram, seier Andris.

Om idrettsgallaen

Idrettsgallaen si historie går tilbake til 2002, og blir arrangert for 19. gong i 2020. Arrangementet er eit samarbeid mellom NRK, Norsk Tipping og Norges idrettsforbund.

Blant prisane er «årets gjennombrudd», som gjekk til Jakob Ingrebrigtsen i 2019, og «årets forbilde», som gjekk til Karsten Warholm.

Dette er kriteriene til «årets ildsjel»: 
• Vedkomande har gjort ein solid innsats for idretten.
• Ho/han kan vera anten trenar, tillitsvalt eller ha andre verv i idretten.
• Ikkje vera heiltidstilsett.

Finalistane:
Brit Eirin Tungeland frå Os Turneforening i Hordaland.
Vivian Nilsen frå Berlevåg Turn & Idrettsforening i Finnmark.
Sverre Inge Lystrup Ness frå Hommelvik Guts i Trøndelag.
Rolf Hansen frå Galterud IF i Hedmark.
Karin og Kåre Ivar Melsæther frå Bærums Verk Hauger IF i Akershus.

Les meir om

Lokal