Denne våren har eit nytt bygg, gjennomført i eldgamal byggeskikk, blitt oppført på Borgafjellet.
Gapahuken er gitt i gåve til Os Turlag, og kan nyttast av alle.
Bak byggverket står Harald Døsen, Peder Føysand og Bernt Norevik. Dei tre kameratane har hatt dette som hobby nokre år no, å legga til rette for friluftsfolk, frå dei som «Brukameratane» fekk realisert Knutabruo.
Seinare har det vore både vedlikehald, hogst og fleire bygg i same terreng. No har dei gått i høgda, og Peder sin son, Anders Fløysand i Varde Film, har funne fram kamera.
– Eg er vant med at far min har høg aktivitet med ulike prosjekt, og glad for at desse tre pensjonistane har det så kjekt saman, seier Anders.
– Det er dessutan stas at resultata av desse prosjekta er noko mange kan ha glede av.
Varde Film har gjort fleire opptak. Videoen dei la ut i dag er ein kortversjon.
– Eg synest dette med at dei tar ut tømmer sjølv, prosessen tømmeret er gjennom - og det at dei held gamal byggeskikk ved like, er veldig interessant. Både aktiviteten og bygginga er verdt å dokumentera, samtidig ville vi legga ut ein liten hyllest til desse tre som gjer ein innsats for mange.