Medan Enya, Henrik og Benjamin var i grupperom med Marte Rommetveit frå NRK Hordaland, sat dei andre 10. klassingane ved Nore Neset skule og lytta til korleis dei tre medelevane klarte seg.
– Vi skal ut til 27 skular i Hordaland, Nore Neset er den einaste i Os som har meldt seg på, fortel Rommetveit, som no er på veg til Ytrebygda skule.
Nore Neset skule, som også deltok i klassequizen i fjor, var 5. skule ut i årets quiz.
8 av 12 rette
Dei tre elevane frå Nore Neset måtte svara på spørsmål i tre kategoriar; knappar, bokstaven O og bilde, fire i kvar kategori.
Elevane visste blant anna at uttrykket "knappar og glansbilde" betyr dårleg betalt, at den amerikanske byen Columbus ligg i Ohio og at Leonardo da Vinci har malt Mona Lisa.
Men dei missa på årstalet for OL i Oslo, som var i 1952, ikkje i 1956.
– 8 av 12 er bra, men sidan vi allereie har skular som har 9 og 10 rette blir det ikkje finaleplass på norenesingane, seier Marte.
På denne sida på NRK.no kan du lytta til radio og ved å velja sendinga frå klokka 08:33 får du med deg Nore Neset på klassequizen.