I mål med gode hjelparar

På Halhjem har ivrige dugnadsjeler og skatere jobba hardt gjennom heile vinteren for å ha klar Switch skatepark til vårsola titta fram. Laurdag 24. april kom elementa med trailer frå Polen og ein lang dag gjekk mot kveld før utolmodige skaterar kunne ta parken i bruk.

- Det blei eit 12-timars skift før dei siste elementa var montert.

- Men dei supre tilbakemeldingane vi fekk frå skaterane etter at dei slapp ut på gjer det verdt det, smilar eldsjel Bjørn Madsen.

Kom i mål også økonomisk

Frå prosjektet starta for fullt i desember har Madsen stått på saman med medlemar av skateparken og Søre Neset idrettslag for å kome i hamn.

- Det har vore ei fantastisk innstilling og innsats frå alle.

- Tommy på Maxprint hjalp oss med å kome i mål økonomisk med å nytte sine kontaktar i næringslivet.

- Nabolaget, med Halhjemsmarka 2 velforening, har stilt opp og vedteke å gje 10 000 kroner til prosjektet. På vegne av skaterane må eg berre få takka.

- Det er veldig kjekt å sjå at tilbodet blir satt pris på i nærmiljøet, seier ein ydmjuk Madsen.

Tryggleik i høgsete

Etter at elementa kom på plass er det mange som vil nytte området til skating og leik.

- Det er grunn til å minna om at dette er ein skatepark og ikkje ein leikeplass.

- Størrelsen på parken gjer at det grunna sikkerheiten ikkje er lov med anna enn skateboard på parken.

- Ein anna ting er at det er påboden med hjelm. Vi ventar på skilt som skal opp om dette, forklarar Madsen som håpar alle er flinke til å tenkje tryggleik for seg sjølv og andre når dei nyttar parken.

Kurs og demo

Laurdag 2. juni blir det offisiell opning av parken. Før den tid håpar Madsen at sjølve skateklubben har kome godt i drift og at dei første skatekursa for nybyrjarar er planlagt.

- Vi er òg invitert til marknadsdagane i Os sentrum 28. april for å halde ein skatedemo.

- Det gler vi oss stor til, avsluttar ein nøgd Bjørn Madsen.

Vil du sjå fleire bilete frå byggjinga av skateparken finn du det her.