I trafikken: Fleire politikontrollar – og éin kalv
Skreiv ut førelegg både i 70-sone og Lepsøykrysset.
Politiet har i helga hatt fem kontrollar i trafikken, to av dei har ført til reaksjonar.
Fredag morgon blei det, som omtalt fredag, skrive eit forenkla førelegg for ikkje å ha stoppa ved skilt i krysset mellom Lepsøyvegen og E39 Halhjemsvegen.
Det resulterer i 10.450 kroner i førelegg og tre prikkar på førarkortet.
Søndag i 15-tida hadde politiet fartskontroll i 70-sona på Halhjemsvegen.
– Det blei skrive ut fem forenkla førelegg, opplyser politioverbetjent Anne Lyssand.
Høgaste målte fart var 86 km/t i 70-sona.
Det resulterer i eit førelegg på 7250 kroner og er akkurat nok til å få to prikkar på førarkortet.
Det var ruskontroll på Byvegen og på Hatvikvegen fredag morgon, med til saman 55 kontrollerte. Politiet fann ikkje noko å reagera på.
Det gjorde dei heller ikkje under tungbilkontroll på Halhjemsvegen same morgon. Der var det 17 kontrollerte.
I 21.30-tida laurdag kveld fekk politiet melding om kalv i vegen i Mobergsbakken. Bonde blei kontakta, og han tok hand om kalven.
