Bildeserie:
Onsdag opna Tysnesfest, torsdag var første kveld med artistar på hovudscenen på Gjerstad.
Første musikar på scenen var Aurora Aksnes, stjerneskotet frå Os som for halvanna år sidan tok første steg inn i artistverda ved å toppa Urørt-lista få timar etter første opplasting.
– Eg hadde ikkje venta så mykje publikum klokka 18 på ettermiddagen, men det var ein god gjeng og det blei fleire og fleire den halvtimen vi spelte, seier Aurora til Midtsiden.
– Enorm energi
I sommar har ho spelt både Festspillene i Bergen, på Havfest i Austevoll, på Hove og i Horten. Men ingenting slår Tysnes. Til no.
– Publikum hadde ein fantastisk energi, det var heilt nydeleg, synest Aurora, og legg til at ho ser veldig fram til å synga på Osfest første helga i august.
Men først skal Aksnes synga på festivalen Utkant.
Meir idyll
Etter Aurora følgte Postgirbygget og Oslo Ess.
– Dette har vi sett veldig fram til, seier Trine Engdahl Jepsen og Maria Halhjem, to venninner som sikra seg ein god plass nær scenen.
Postgirobygget hadde god kontakt med publikum heile vegen og det blei allsang på låta Idyll i sommarvarmen.
Det kjente, britiske gladrock-bandet Status Quo runda av kvelden med klassikarar som Whatever You Want frå 1979 og In The Army Now frå 1986.
Fredag kveld spelte blant anna Henning Kvitnes og Ylvis på Tysnesfest, i kveld skal Morten Harket, Timbuktu og Damn og Leningrad Cowboys på scenen.