Ikkje berre fisk på kroken

Bildeserie:

1 av 11

Det skulle meir til enn litt ruskevêr for å skremma alle dei frammøtte fiskarane som var klare for fiskekonkurranse i Øyane laurdag.

Litt under 100 påmeldte, både store og små, gjorde seg klare til å få både mest og størst fisk.

Opningstalar for dagen var fungerande ordførar Marie Bruarøy, kledd i både sydvest og redningsvest for anledninga.

Det blei servert heimelaga suppe, saniteten selte vaflar og lodd og den lokale musikaren Kurt Røttingen underheldt dei frammøtte med songar frå Johannes Kleppevik.

Gabriel, Eirik og Ingrid gleda seg veldig til å koma i gong med konkurransen.

– Vi er med for første gang og vi har tenkt å få tak i lyr, torsk og makrell.

– Ein gong fekk vi ei nise og vi har fått horngjel, fortel dei ivrige fiskarane som lovar å koma tilbake og fortelja om fangsten.

Å vekka interessen blant dei unge er viktigst

Arrangørane frå Os Småfiskarlag er nøgd med oppmøte på kaien.

– Det var 107 påmeldte i fjor så vi nærmar oss, trass dårlegare vêr.

– Det viktigaste er at vi klarer å vekka interessen blant ungdomen, fortel Kåre Gjerdvik.

Ingen premie for bukse

Etter to timar på sjøen byrjar gjengen med fiskarar å koma til land for å vega fangsten.

Og det varierer veldig kva dei har i posen, alt frå ingenting til Christian og Mathias Lekven som kan visa fram ei bukse dei fekk på kroken.

– Det burde vore premiert for den raraste fangsten, kjem det lattermildt frå småfiskarlaget.

Premie blei det ikkje, men ein artig historie har dei fått med seg.

Det blei ingen premie på dei ivrige fiskarane Gabriel, Eirik og Ingrid heller, men dei er veldig fornøgd med dagens fisketur.

– Sjå her! Vi fekk ein horngjel, fortel dei og viser fram både horngjel, makrell og hyse.

Vann krabbekokar

Den som fekk den tyngste fangsten totalt i konkurransen var Mathias Gaasdal i klassen under 10 år, han hadde med seg ein pose med fisk som vog heile 13,48 kilo.

Blant dei mellom 10 og 16 år var det Anja Haugstveit som vann og Daniel Garvik drog sigeren i land i den eldste klassen.

Det var tydeleg at den store fisken var vanskeleg å få has på denne dagen, for vinnaren av hovudpremien, den tyngste fisken, gjekk av med sigeren med ein lyr på 1,82 kilo.

Lyren gjorde at den unge fiskaren Viktoria Nilsen vann seg ein krabbekokar, noko ho syntest var veldig kjekt.

– Eg har éin krabbe, men no trur eg at vi må ut og få tak i mange fleire, seier ho fornøgd.

Sjå bildeserie av fiskekonkurransen øverst i saken.