- Ikkje gjort oss bort
Bildeserie: Juniorhandballjentene til Os avslutta Bringserien med éin siger, to tap og niande plass i pulja. - Det blei eit verdig punktum, meiner trenaren.
Bildeserie:
J16-laget til Os Turn har gjennom sesongen deltatt i den nasjonale Bringserien med éin serierunde i månaden. I helga var det storsamling i Oppsal Arena kor alle dei 48 laga i serien spelte på dei fire banane. Berre dei fire beste frå kvar pulje gjekk vidare til sluttspelet.
- Både eg og jentene var skuffa over eigne prestasjonar på laurdag, men med sigeren sundag fekk vi ei verdig avslutning på turneringa, oppsummerer trenar Frode Fyllingen.
Laurdag formiddag møtte Os Tveter frå Skjeberg utanfor Oslo. Tveter var, i det minstepå papiret, den sterkaste motstanderen til Os denne helga, men Os hang godt med og låg berre eitt mål bak til pause. Andreomgangen helst fram like jamt, men med Os eitt til to mål bak. Osjentene klarte ikkje å henta inn leiinga og måtte sjå seg slått 27-24.
- Kampen viser at vi kan spela jamnt med dei beste, men vi er avhengig av det lille ekstra for å få det til å tippa vår veg.
Slukna i pausen
Den andre kampen laurdag gjekk mot Ramnes, som før kampen berre hadde vunne to kampar tidlegare i serien. Os starta i eit forrykande tempo og gjekk til pause ni mål framfor med 14-5. Os hadde god kontroll på kampen og skulle berre sikra sigeren i andre omgang.
Det skjedde ikkje. I løpet av dei første tretten minutta skåra Os berre éin gong, medan Ramnes åt seg innpå og låg berre to mål bak halvvegs i omgangen. At dei var i ferd med å mista leiinga prega Os. Spesielt i angrep gjekk det i stå med dårlege avslutningar og feile val. Kort tid før slutt gjekk Ramnes opp i 20-19 leiing, noko som heldt seg kampen ut.
- Etter den kampen var vi langt nede alle saman.
- Vi får skade på Marte Haugsdal som nok betyr eindel, men vi skal likevel vera gode nok til å dra i land sigeren, meiner Fyllingen.
Reiste seg
Turneringa sin siste kamp gjekk sundag mot Froland som to plassar bak Os på tabellen. I denne kampen er det tydeleg at Osjentene vil vinna og guts og vilje er tilbake hos dei gule. Dei to laga følgjer kvarandre gjennom heile kampen med Froland to mål framfor til pause (14-12). Osjentene gjev likevel ikkje opp og kan tilslutt gå av bana med ein fortjent 27-24 siger.
- Det bur mykje i desse jentene, noko denne kampen er eit prov på.
- Alt i alt har opplevinga av å vera med i Bringserien vore positiv.
- Eg håper jentene tykkjer det same og at det har gitt dei inspirasjon til å satse vidare på handballen, seier Fyllingen som trur det kan bli mykje morro med Oshandballen i åra som kjem om ein klarar å halde på talenta samstundes som ein tek vare på bredden.