Ingen buss i Os viss streiken blir utvida

Måndag blei resten av bussjåførane i Noreg tatt ut i streik, gjeldande frå laurdag, om ikkje forhandlingane fører fram.

Dersom det blir streik, blir det ingen avgangar med Skyss sine busser i bergensområdet, som omfattar ruteområda Bergen sør (inkludert Os), Bergen sentrum, Bergen nord, Vest og Nordhordland.

– Digital ruteinformasjon (appen Skyss Reise og sanntidstavler) vil ikkje bli oppdatert med innstilte avgangar, men vi vil leggje ut generell informasjon om streik i alle våre kanalar, opplyser Skyss.

– Vi oppfordrar til å reisa minst mogleg dersom det blir busstreik.

Tilsette i Bybanen er ikkje omfatta av streiken, og Bybanen vil gå som planlagt.

– Det er grunn til tru at det kan bli meir trengsel på Bybanen enn vanleg. Av omsyn til smittesituasjonen oppmodar vi alle om å unngå å reisa, og dersom ein likevel må reisa, ber vi om å nytta munnbind, også utanom rush.

Ber VGS-elevar kontakta faglærar

– Sjølv om streiken blant bussjåførane vert utvida frå førstkommande laurdag, vil undervisninga halda fram som normalt ved dei vidaregåande skulane i fylket, seier Bjørn Lyngedal, fylkesdirektør for opplæring og kompetanse i Vestland fylkeskommune.

Elevar som må vere heima grunna manglande skuleskyss vert bedne om å melda frå til faglærar slik at det kan leggjast til rette for arbeid med oppgåver. Elevane kan ikkje forventa å få videoundervisning som følgje av manglande skuleskyss.

Elevane som ikkje kjem seg til skulen på grunn av streiken vil ikkje få fråvær.