Ingen kvardag på Er-An Veikro
Bildeserie:
Interessa rundt nye Er-An Veikro har vore enorm.
Artikkelen vi skreiv fem dagar før opning er blant dei mest leste og delte sakene på Midtsiden nokosinne.
Og interessa er ikkje berre digital.
– Det har vore heilt katastrofe, seier Linda Andersen, i den mest positive forma ordet katastrofe kan ha.
Linda eig nye Er-An Veikro saman med dottera Hanne Catrine.
– Vi har hatt fullt hus og sjølv om vi har sagt at det har vore éin time venting på mat har folk venta tålmodig.
– Flotte gåver og fantastiske tilbakemeldingar har vi også fått, det såg ut som ein blomebutikk her i påsken, og tysdag kom ordførar Terje Søviknes med blomar frå Os kommune.
Rekord-opning
Opningsfesten blei innleia av lukka lag fredag og laurdag, påskeaftan. Fredag med handverkarar, laurdag med venar.
– Twang Gang var med på å laga mykje liv, og hadde med seg Ine Tumyr og Reidar Opdal frå ORBO & The Longshots, og gitaristen Tommy Kristiansen, kjent frå fleire musikkprogram på TV2, blant anna Idol og Hver gang vi møtes.
– Laurdagen hadde dei med seg ei swinggruppe som sette sitt preg på den allereie strålande stemninga.
Søndag 1. påskedag var opningsdagen, og den blei svært vellukka, med mykje gjestar, også tilreisande, blant anna frå Sotra.
– Både søndag og måndag 2. påskedag hadde vi cirka dobbelt så stor omsetnad som rekorden på den gamle Er-An Veikro.
Kvardagen som ikkje kom
– Tysdag trudde vi at vi endeleg, etter ei hektisk helg, skulle få litt kvardag og tid til å landa litt, men det har vore travelt heile veka. Vekedagane har vi hatt fire gongar så stor omsetnad som vanleg i vekedagane.
Andersen har fått nokre spørsmål om satsinga, og om dei trur dei vil klara seg etter det som tydelegvis har vore ei stor investering.
– Vi har faktisk budsjettert veldig varsamt, med tilsvarande omsetnad som på førre vegkro. No skal vi, i motsetnad til tidlegare år, driva heile året gjennom. Men eg trur vi skal klara oss heilt greit.
Mat, drikke og live-musikk
Er-An Veikro har no ope kvar dag heile veka, frå formiddag til kveld. Skjenkeløyve i alle formar har dei også, men det blir berre av og til at dei skal kjøra live-musikk.
– Vi fekk jo testa dette med live-musikk første helga, og avdelinga som kan ryddast klar til scene fungerte veldig fint og lyden var knakande god.
Men hovudfokuset er på mat.
– Vi har laga ein fyldig meny, men har starta varsamt med utdrag frå menyen, og supplerer med tre og tre nye rettar frå kvar veke til heile menyen ligg ute klar for bestilling.
– Det viktigaste no er at alt fungerer og at maten smakar godt, og rettar som spare-ribs og bbq-burgeren har vi allereie fått flotte tilbakemeldingar på, seier Linda om den superamerikanske vegkroa på Røykenes.