Ingen skadd i brann på Tysnes

I 4-tida natt til søndag kom det melding om brann i Tysnes skule. Skulen ligg nær festivalområdet på Gjerstad.

Klokka 05.10 meldte brannvesenet at brannen var under kontroll, ifølgje 110 på Twitter. Lokalt brannvesen fekk assistanse frå Ølve og Arna.

Fleire personar overnatta på skulen under festivalen, og ni personar blei evakuerte, skriv BT.no.

– Det skal ha vore i eit medietek/bibliotek det var brann. Personane oppheldt seg i ein annan del av bygget, og alle var uskadd, seier operasjonsleiar Morten Rebnord til Midtsiden.

Brannen skal ha starta på utsida av skulen. Kledning er brent og brannen hadde spreidd seg til loftet.

Årsaka til brannen er ikkje kjent, men politiet er i gang med etterforsking.

– Det kan sjå ut som om brannen har starta i ein tilhengar som sto parkerti på utsida av skulen, men dette er for tidleg å seia. Det er oppretta sak og brannteknisk og krimteknisk vil sjå nærmare på dette, men det blir ikkje i dag, seier Rebnord.

Eit område rundt delar av skulen er sperra av.