Innbrotsforsøk ved Velumsbrekkene
Ein person vart observert i eit bustadområde torsdag morgon, etter at ein bebuar vakna av mistenkelege lydar.
Torsdag morgon vakna ein bebuar i Velumsbrekkene av lydar rundt klokka 05.30, og observerte ein person på staden.
Personen hadde forsøkt å bryta seg inn ein dør til eit uthus.
– Blå jakke og halvlangt hår, slik blei personen skildra, skriv politioverbetjent Knut Magnus Fjeld i ein e-post til pressa.
Meldinga om innbrotsforsøket fekk politiet først i 9-tida.
– Oppdraget blei avslutta med «Ikkje kapasitet», seier Fjeld.
Oppdatering klokka 14:
Midtsiden har blitt kontakta av ein innringar som vil opplysa om at hendinga var annleis, og meir alvorleg, enn det som kjem fram i politiloggen.
– Det var snakk om inngangsdøra til ein bustad, seier tipsaren.
Tidspunktet var også annleis enn rapportert over. Hendinga skal ha skjedd klokka 00.45.
– Det kan vera greit for folk i området å vita om, i fall andre har opplevd noko liknande, eller gjort observasjonar.
Midtsiden har bedt politiet stadfesta den nye informasjonen, men har endå ikkje fått svar.
Oppdatering klokka 15:
– Det var snakk om eit bebodd uthus, spesifiserer politioverbetjent Fjeld om meldinga frå politiloggen.
– Eg kjenner ikkje til tidspunktet frå tipsaren. Meldinga til politiet gjekk ut på at dette skal ha skjedd klokka 05.30.