Innovasjonspris til «Heima best»-prosjektet
– Vi tenker nok ikkje så mykje over at vi blir forska på.
«Heima best» er ein del av forskingsprosjektet INCA.
INCA står for Innovation in municipality home-based health care services, enkelt omsett til innovasjon i kommunale heimetenester, og er eit samarbeid mellom NORCE, Senter for omsorgsforskning ved Høgskulen på Vestlandet (HVL), Bergen kommune og Bjørnafjorden kommune.
«Heima best» er testa ut på to avdelingar i heimetenestene i Bjørnafjorden: Gruppe 2 Fusa og Avdeling 3 Os.
Forskarar frå NORCE og Høgskulen på Vestlandet har følgt arbeidet undervegs.
– Vi tenker nok ikkje så mykje over at vi blir forska på, seier avdelingsleiar for Avdeling 3 Os, Hilde Hjelle, i eit intervju med kommunen si heimeside.
Avdelinga hennar har prøvd ut den nye arbeidsmetodikken dei to siste åra.
I september, under Kunnskapskommunekonferansen i Bergen, blei prosjektet tildelt årets forskings- og innovasjonspris.
I grunngivinga for prisen, heiter det mellom anna at:
INCA er et innovasjonsprosjekt som har ført til ny organisering av hjemmesykepleien i både Bergen og Bjørnafjorden kommune. (…)
I Bjørnafjorden, kjent som «Heima best», har prosjektet bidratt til en omstilling mot nye arbeidsmåter og tjenester. På mange måter er Bjørnafjorden tidlig ute i den omstillingen som vi ser mange kommuner også må gjennom fremover – både i å jobbe på nye måter, og å få en ny organisering og levering av tjenester, ifølgje alrekhelseklynge.no
Heima best-prosjektet er eit forsøk på å løysa ei av dei verkeleg store samfunnsutfordringane våre: Fleire eldre og pleietrengande, samstundes som vi er færre til å jobbe i helse- og velferdstenestene.
Lengst og best mogleg i eigen heim
Målet med Heima best er å utvikla dei kommunale heimetenestene, og legga til rette for at folk kan bu lengst mogleg i eigen heim.
– Før budde vi kanskje ti år på ei buavdeling på ein aldersheim. Slik er det ikkje lenger. Det er ikkje nok institusjonsplassar, bemanning eller ressursar rundt om til å dekka behovet vi no vil møta, seier prosjektleiar for Heima best, Hanne Kårstad Engeseth, i det same intervjuet på bjornafjorden.kommune.no.
– Brukarane merkar nok ikkje forskjell. Først og fremst handlar det om kartlegging, systematisering og kvalitetssikring av oppgåvene våre.
Heimetenestene gjennomfører òg familiemøte med pårørande til brukarar.
Heima best-leiinga skildrar dei tverrfaglege tavlemøta dei har, saman med ergo- og fysioterapitenesta kvar veke, som det aller beste med prosjektet.
Det er òg noko dei håper å ta med seg vidare inn i alle avdelingar i heimetenestene når prosjektperioden for Heima best er over til nyttår.
