Invaderer Stord
Vel 200 handballspelarar frå Nore Neset, Lysekloster og Os Turn nyttar pinsa på handballfestival på Stord.
For 25. gong inviterar Stord IL til Handballfestivalen. Jubileumsåret blir eit festår på fleire måter, ikkje berre feirar festivalen 25 år, Stord IL er i tillegg 100 år og ein har rekordhøg deltaking med heile 350 lag.
Rekordstor er deltakinga frå klubbane i Os også.
Heile 20 lag frå tre av dei fire handballklubbane i Osbygda legg turen over fjorden for å kappast mot lag frå Hordaland og Rogaland.
Nore Neset størst
Nore Neset er den av dei lokale klubbane som stiller flest med heile 14 lag frå guter 10 til jenter 16. Lysekloster stiller med heile klubben med lag i jenter 11, 12 og 13, medan Os Turn mønstrar tre lag i jenter 10 og 14.
Kampane blir spelt både inne og ute på Vikhaugane. Det er duka for fleire lokaloppgjer.
Os og Nore Neset 2 møtast i J14, Lysekloster og Nore Neset 2 i J11 og Nore Neset 1 og Os 2 i J10.
Sjå kampoppsettet for dei lokale laga her.
Handballfestivalen blir opna med parade ned i Leirvik sentrum og opning av landslagsstjerna Amanda Kurtovic, som nett har kome heim til Noreg og Oppsal etter å ha spelt i danske Viborg.
Til Fredrikstad for 1. gong
Medan 20 lag stikk til Stord, er det eitt lag som stikk motsatt veg. På morgontoget frå Bergen sit nemleg Os Turn sitt J15-lag på vei til Fredrikstad.
– Vi gler oss. Det blir første gongen vi deltek i Fredrikstad Cup, fortel trenar Gitte Torp.
Fredrikstad Cup er Noregs største handballturnering med 603 lag og over 8000 deltakarar som skal spela tilsaman 1600 kampar på 29 baner.