Inviterer næringslivet til (digitalt) møte

Nytilsett dagleg leiar i Bjørnafjorden Næringsråd, Synnøve Reksten Mowinckel, seier i ein epost til næringsdrivande i Bjørnafjorden at ho skulle ønskt å bli kjent med medlemmane i næringsrådet på eit anna vis, men at ho no jobbar tett med kommunen for aktivt å hjelpa det private næringslivet i kommunen - digitalt - i samband med koronaviruset.

– Det er viktigare enn nokosinne å stilla opp for kvarandre og sjå etter nye løysingar! skriv ho, og inviterer til møte.

– Vi jobbar med å få ei digital plattform på plass, så vi kan organisera digitale møte og kurs for å hjelpa kvarandre.

Ambisjonen er å ha første virtuelle møte førstkomande fredag. Tema blir bemanning og rettar i samband med støtteordningar frå regjeringa.

Næringssjefen i kommunen, Elin Bryn Thorsen, har sendt ut epost der ho ber næringsdrivande svara på ei undersøking.

– Det er fleire bedrifter som har permittert tilsette, og fleire som no står i fare for å måtta permittera. På den andre sida er det fleire som har eit stort bemanningsbehov, skriv Thorsen, og håper mange svarer på undersøkinga dei har fått tilsendt.