Irriterer seg over folk som køyrer for seint

6 av 10 trafikantar i Hordaland seier at dei har opplevd farlege situasjonar i trafikken i samband med at bilistar køyrer UNDER fartsgrensa.

– Mange av oss har opplevd å ligga bak bilar som køyrer seint. Når det i tillegg er stor trafikk i motgåande retning, eller svingete eller dårlege vegar, kan det vera vanskeleg å koma forbi, seier Arne Voll, kommunikasjonssjef i Gjensidige.

I ei fersk undersøking gjennomført av Ipsos for Gjensidige seier heile 60 prosent av bilistane i Hordaland at dei har opplevd nettopp dette.

- Når irritasjonen er så høg er det dessverre nokon som til slutt køyrer forbi, også på uoversiktelege strekningar. Kvart år får slike forbikøyringar dessverre katastrofale følgjer.

– Sjå i spegelen og slepp andre forbi

I undersøkinga er det flest menn som fortel om farlege situasjonar grunna folk som køyrer seint. Yngre menn er oftare irriterte enn eldre.

– Dette er ikkje ei oppmoding om å køyra fortare, men at dei som ligg bak viser tolmod og held god avstand, og at dei som ikkje har sjanse å halda fartsgrensa slepp andre forbi.

- Sjekk spegla regelmessig. Ser du at nokon kjem tett på bak, eller at du lager kø, så finn ein eigna plass å køyra til sida. Om dette er vanskeleg, finn ein oversikteleg stad, seink farten og blink inn til sida. Men om du ligg bak, hugs at det er ditt ansvar å vurdera om det er trygt å køyra forbi, ikkje vedkomande som gir signal.

Skjer truleg dagleg i Os

Voll seier han reknar med at det for eksempel dagleg er bilistar på ved til ferjene på Halhjem som irriterer seg over medtrafikantar som køyrer for seint.

– Årlig skjer det alvorlege skader fordi nokon «berre» skulle køyra forbi. Sjølv er eg ikkje glad i bilar som køyrer fort eller legg seg tett opp i meg. Då hjelper eg dei heller å koma forbi, og på få sekund er han vekk. Det er enkelt og begge blir nøgd, og det er tryggare enn om du skulle provosera fram ein farleg situasjon fordi du meiner at din fart er passeleg fart for alle andre.

Den som blir forbikøyrd har plikt å hjelpa til

Politiet kan bøtelegga bilistar som ikkje held fartsgrensa, også dei som køyrer under fartsgrensa.

– Har du inntrykk av at politiet er flinke til å følgja med også på denne delen av trafikkbildet?

– Sjølv om det kan vera vanskeleg for politiet å få med seg alt som skjer, meiner vi at dei gjer ein svært god jobb med trafikktryggleik, seier Arne Voll.

Ifølgje «Forskrift om kjørende og gående trafikk (trafikkregler)» paragraf 12 har den som blir forbikøyrd plikt å bidra til at forbikøyringa blir trygg og vellykka:

Når noen vil kjøre forbi til venstre, skal forankjørende holde så langt til høyre som mulig, og ikke øke farten. Når kjøretøyet beveger seg sakte eller tar stor plass, og vegen er uoversiktlig eller har motgående trafikk, skal føreren om nødvendig vike til høyre og sette ned farten eller stanse.