– It was meant to be

Laurdag brakar ein innhaldsrik haustsesong laus på Oseana når Stig Eldred og hans mange S'ar inviterer til cabaretkveld med runde bord og dansegolv.

- Det blir musikk frå Hellbillies og gamaldans til The Eagles, Elton John og Pink Floyd.

- Eg kan lova deg at det blir ein minnerik kveld for både publikum og oss på scenen, seier Stig Eldred.

Film og musikk

Du drar kanskje kjennskap på mannen midt på bildet frå reklamefilmar på fleire TV-kanalar for eit norsk teleselskap.

- I tillegg til å vera musikar, driv eg som skodespelar og som "voice" når det trengs legga stemme på ein film eller lydklipp.

- Den første filmen var eg med på som 13-åring, fortel den no 60 år gamle amerikanaren med røter frå Sverige.

Søkte røtene

Nettop dei svenske anane er grunn til at karen, som bur vinterhalvåret på New Zealand, våren og hausten i Los Angeles og somrane i Skandinavia, hamna på Os.

- Det er ei lang historie. For nokre år sidan var eg i Sverige for å finna igjen slekta min. Samstundes var det ein ven av meg frå New Zealand som skulle gjera en spelejobb i Danmark. Eg drog og besøkte han og hadde ei kjempestund.

- Han fortalde meg om ein kar i Bergen, skotske Steve Morgan, som eg måtte ta kontakt med om eg var på dei kantar.

- Tidlegare i år var eg i Bergen og tok kontakt med Steve. Vi fann tonen og spelte saman på Dyveke.

- Då eg fortalde at eg skulle spela på Os og var på jakt etter ein trommeslagar berre lo Steve av meg. Han visste akkurat kven eg skulle kontakta, fortel Eldred.

- Vi er like gale

Trommeslagaren Steve tenkte på var sjølvsagt osingen Magne Lunde.

- It was meant to be, slår Eldred fast.

- Magne er eit fantastisk menneske med eit generøst hjarte. Kontakten var der med ein gong.

- Du veit det skil berre eitt år og tre dagar mellom oss og vi er like gale begge to, smiler Eldred.

Chigen frå legendariske Hoolegens

Eldred fekk Lunde med seg på trommer, og tok sjølvsagt med seg Steve Morgan på gitar, i tillegg til dei fire han allereie har med seg som band.

- På toppen av det heile har vi fått med Chigen frå det legendariske bandet Hoolegans, som herja på seksti-talet.

- Det kjem til å bli ei feiring av musikk frå heile verda med eit utruleg trøkk, lover Stig Eldred, som sjølv handterer piano og, i denne samanhengen, noko så uvanleg som toradar.