Isen ved sivet langs Ulvenvatnet kan vera tynn og utrygg. Dette bildet er tatt i 2012. (Foto: Ørjan Nilsen)
Isen ved sivet langs Ulvenvatnet kan vera tynn og utrygg. Dette bildet er tatt i 2012. (Foto: Ørjan Nilsen)

Jente gjekk gjennom isen

– Hald deg unna sivet i Ulvenvatnet ved Mobergsbrua, åtvarar Tomas Herland, som i dag prøvde å åtvara ei jente sekunder før ho blei våt til halsen.

Kjetil Vasby Bruarøy
12. januar 2016 - 22:36

Isen er trygg på vatna i Os, men ikkje alle stadar. Som nemnt i Norsk Folkehjelp sine isvett-reglar (sjå nedst) kan isen vera tynnare fleire stadar, blant anna rundt siv og planter.

– Eg var på sørsida av Ulvenvatnet, mot Moberg, då eg såg ein far med to born som var på veg frå Ulven-sida av brua og mot meg, fortel Tomas Herland.

Dette var rundt klokka 19.40 tysdag kveld.

– Då bestemte eg meg for å skøyta bort og åtvara dei mot å gå nær sivet. Eg hadde akkurat kome bort der då den eine ungen, ei jente som såg ut til å vera i tidleg barneskulealder, gjekk endå tettare sivet.

– «Ikkje gå bort der» sa eg. Så sprakk isen.

Våt til halsen

Jenta gjekk gjennom isen med heile seg og blei våt til halsen.

– Ho var nok heldig at det berre var 1,5 meter djupt der ho gjekk gjennom, elles kunne ho nok fått hovudet under vatn, seier Herland.

Faren var i nærleiken og var rask med å få ho på land.

– Eg har vore på isen dei to siste dagane og synest det er utruleg at ikkje fleire har gått gjennom isen ved sivet, for det har vore mykje folk også i det farlege området.

– Det er kjekt at mange koser seg på isen, men enkelte føler seg tydelegvis litt for trygge.

Uhell på Drange

Os brannvesen har vore på Langavatnet i dag, som first responder.

– Då var det ikkje folk gjennom isen, men ein som hadde skadd seg, opplyser varabrannsjef Arne Monsen.

Sjå òg: Slik reddar brannvesenet deg på isen (med video frå Ulvenvatnet i dag)

Vis isvett!

1. Den mørke, gjennomsiktige stålisen må vera minst 10 cm tjukk
2. Den gråkvite, porøse snøisen må vera minst 20 cm tjukk
3. Sjølv om isen har god bereevne, hald deg vekke frå:
• Utløp av elver og bekker
• Trange sund
• Kloakkutlaup
• Langs brygger og kaiar
• Langs strender med vekslande vasstand – spesielt regulerte vatn
• Strandområder med siv og planter
4. Går du gjennom isen - leit deg fram til der isen er mørkast – der er det ope vatn. For å kom opp bruk det du har for handa av spisse gjenstandar til å hogga tak i isen. Hjelp til med kraftige spark
5. Om andre går gjennom isen - få tak i noko som kan skyvast ut til vedkomande, f.eks. ein staur, busk, ski, stavar eller ein jakke. Ikkje gå oppreist, ak deg fram på magen og skyv gjenstanden framfor deg til den går i vatnet. Er det fleire på isen så lag ei lenkje ved å halda kvarandre i beina og ak fram for å redda den som har gått gjennom.

(Kjelde: Norsk Folkehjelp)

Les meir om

Lokal Brann og redning