Arild Olseth Syre og Lasse Nordahl-Pedersen rapporterte heim frå turen, her på siste av 10 toppar. (Privat foto)

Jogga heile Jaktfalken på éin dag

10 toppar på ein torsdag: Arild og Lasse la i går bak seg 35 kilometer og klatra 2600 høgdemeter.

image
image
image
Av: Kjetil Vasby Bruarøy

I går fortalde vi om relansering av turmerka Jaktfalken (10 toppar) og Vandrefalken (5 toppar).

– Eg trur Vandrefalken starta på 80-talet, og det var fleire hundre i året som tok merket i starten, seier Tore Njøten, som i 1991 var førstemann til å gå alle dei fem toppane på éin dag. Jaktfalken, med 10 toppar, kom noko seinare.

I går var det to andre karer, Arild Olseth Syre og Lasse Nordahl-Pedersen, som tok merke på éin dag, men dei gjekk for 10 toppar. Planlegginga av turen starta før omtalen vi kom med i går.

– Vi såg at ein del av toppane låg som perler på ei snor, og har snakka om dette sidan i haust. No passa det endeleg, og turen blei litt kortare når Gråfjellet no var skifta ut med Linken, seier Lasse.

– Det visste eg faktisk ikkje før vi var på veg, så det er bra at Lasse er flink å halda seg oppdatert, seier Arild.

1 + 9 fjelltoppar

Turen starta i Lysefjorden klokka 10.30. Ein knapp time seinare hadde dei to treningskameratane vore oppom Lyshorn. Så køyrde dei med to bilar, for å plassera éin på Hjelle, og så heldt dei fram til Øvredal.

– Turen frå Svinningen til Midtsæterfjellet var heilt fantastisk, med flott utsikt og godt driv.

– Men mellom Midtsæterfjellet og Rødsfjellet var det ikkje like lett å ta seg fram. I tillegg fekk Arild litt smerter i kneet og eg hadde eit lite overtrakk, så resten av turen var i søndagstempo.

Ei god oppleving av nye fjell

Lasse er sambuar med Arild si søster, og dei to kameratane trener og deltar i konkurransar saman.

– Vi er ganske jamne, men vi er ikkje vant med så lange turar. Det er i alle fall det lengste løpet eg har hatt, seier Arild.

Stykket frå Svinningen til Midtseterfjellet har han tatt før, men han har ikkje vore på Rødsfjellet eller Tøsdalsfjellet før.

– Det var fine fjell! Eg har vore på Linken og Møsnuken før, men berre opp og ned igjen. Turen frå Møsnuken via Tøsdalsfjellet til Linken var veldig fin, sjølv om den gjekk seint og vi allereie var slitne.

58.000 skritt

Siste topp var Borgafjellet.

– Gav turen meirsmak?

– Nei. Det var langt. Men kanskje det blir fleire langturar ein gong, når vi har gløymt denne, seier Arild.

Lasse fortel at turen var 35 km lang, 2600 høgdemeter blei klatra og han brukte 58.000 skritt på å koma i mål.

– Vi tok eit varmt måltid mellom Midtseterfjellet og Rødsfjellet. Inkludert bilkøyring og pause brukte vi åtte timar.

På spørsmål om kor mykje energi du treng til ein sånn tur, svarer Lasse at han ikkje plar sjekka forbruket, men at det gjekk 4700 kaloriar med på turen. Det tilsvarar 19 kvikklunsj, 14 milkshake eller knappe 10 BigMac, så burgeren og colaen på Essoen etter løpet var det god plass til i magen.

– Utfordringa er å få i seg nok på ein sånn tur. Bekkane er tørka ut, så vi hadde med oss to liter med drikke kvar.

I dag kan jerngutane gå til Jernia-Sælen og kjøpa seg ein ny turkopp med logoen til Hegglandsdalen il og Os Turlag på.

Fleire saker