Joker Osøyro er stengt - kjøpmann har meldt oppbod

Joker Osøyro er stengt, og ser ikkje ut til å opna med det første.

– I ekstraordinært styremøte i går blei det fatta vedtak om å melda oppbod (opna for konkurs), seier kjøpmann og eigar av Dragesethuset Colonial AS, Tom-Rune Solheim.

På døra heng ein lapp om at butikken er stengt grunna sjukdom, årsaka er at to av tre tilsette var sjuke måndag morgon.

– Dette har ikkje noko med konkursen å gjera, men inntraff tilfeldigvis morgonen før styremøtet, seier kjøpmannen.

Solheim, som frå før driv Joker Søfteland, oppdretta selskapet då han i mai i fjor kjøpte butikken på Os av Norgesgruppen.

– Butikken har ikkje gått i pluss åra før eg overtok. Målet var både å redusera kostnadar og å auka omsetnad, men eg klarte i grunnen ingen av delane.

Blei nesten selt

Dei siste månadane har Solheim prøvd å selja butikken, og tidlegare i sommar fekk han signert kontrakt med kjøpar.

– Dessverre fekk ikkje vedkomande til å gjennomføra handelen. Samtidig hadde andre interessentar fått beskjed om at butikken var selt.

Uviss framtid

Det er no levert oppbod, og det er for seint å selja selskapet.

Kva som skjer vidare vil ikkje Solheim spekulera i.

– No er det opp til bubestyrar å selja vidare innbu og leigekontrakt. Kjeda var ikkje blant interessentane då eg la butikken ut for sal, men kva dei gjer no veit eg ikkje.

– Dei hadde finansielle musklar til å stå i det, sjølv om butikken gjekk i minus. Eg såg det ikkje som forsvarleg å driva vidare.

Solheim driv Joker Søfteland vidare. Der jobbar han med å få butikken søndagsopen igjen.