Jubeldag hos Kali

Laurdag 16. september blei siste opningsdag etter at vasslekkasjen blei oppdaga. Det som først såg ut til å bli 3-4 veker med stengt klinikk varte til opning i dag.

– Det har vore ein grusom periode! For det første er 8 av 12 behandlarar eksternt, innleigd personell, som ikkje fekk permisjon - for det andre hadde vi mange bookingar som måtte flyttast, og desse måtte flyttast to gongar. Vi har sikkert tatt 300-400 telefonar desse vekene, seier gründar og hovudaksjonær Karlotte Møgster.

Ny medeigar etter at Laila Moberg byrja for seg sjølv er Vibeke Holmen. Karlotte og Vibeke er to av fire fast tilsette, mens åtte andre er innleigde på ulik frekvens, innan ulike fagområde, frå neglar til føter.

Måtte støypa nytt golv

Vasslekkasjen blei oppdaga då golvet i 1. etasje svulma opp.

– Det viste seg at eit avlaupsrør til eit sluk var delvis ute av posisjon. Eg såg for meg ei veke med stenging for å legga nytt golv, forsikringsselskapet tippa 3-4 veker. Det blei dessverre meir enn det òg.

Det gamle tregolvet blei erstatta med fliser, men først måtte nytt golv støypast.

Ni år i same lokale

Kali flytta frå Oshjørnet til Telthuskvartalet i februar 2009, etter å ha hatt ein julebutikk i lokalet i desember 2008.

Lokalet er på til saman 150 kvadratmeter, fordelt på to etasjar.

Her er det butikk og eitt behandlingsrom i første etasje, og fire behandlingsrom, inkludert eit spa-rom med dusj, i andre etasje.

– Vi er jublande glade over endeleg å vera i drift igjen, og over at kundane våre kjem tilbake etter over to måadar med stengt hus.

– Så no er timelistene smikkfulle i lang tid?

– Nei, dei byrjar å fyllast opp, men då vi ikkje har våga å seia opningsdato, har vi i perioden med stenging heller ikkje tatt imot så mange bookingar, seier Karlotte.