Siger etter siger, klem etter klem, kaptein Thale fortel kvifor spelarane har fått så nært forhold til den nye trenaren sin. (Foto: Kristian Bødtker)

Jubelen, gledestårene og nedturen

– Mi mest emosjonelle oppleving på ein fotballbane, seier Ørjan Sandal om Nore Neset/Os-eventyret i Norway Cup.

image
image
image
Av: Kjetil Vasby Bruarøy

I fjor kom eit lag frå Os, Os gutar 17, til finalen i Norway Cup, truleg for første gong sidan 1978.

I år skjedde det igjen, Nore Neset/Os J15 vann alle kampane fram til finalen, utan å sleppa inn mål, inkludert 1-0-sigeren over Gjelleråsen, som dei tapte for i bronsefinalen i fjor.

Finalen var berre knappe tre minutt lang då Stabæk sette inn 1-0, ei stilling som sto seg kampen ut, og Nore Neset/Os endte på 2. plass av heile 44 lag.

– Alle kunne sjå at Stabæk spelte ein betre kamp enn oss. Men så lenge det berre er 1-0 så var vi nær, for det var berre éi skåring som skulle til for at det sto likt igjen, og Stabæk byrja å bli sliten i slutten av kampen. At vi måtte spela dei siste fem minuttane utan toppskårar Vilde Drange Veglo, etter eit gult kort på noko som kanskje var ei rein takling, og dessutan midt på banen, hjelpte dessverre ikkje på.

Enkelte var så skuffa etter tapet i finalen at dei ikkje klarte å pressa fram eit smil då dei mottok den store, fine pokalen for 2. plassen.

– Vi var ikkje i nærleiken av å visa kva vi kan. Det synest eg er synd for jentene, med tanke på alle som følgde dei på TV. For dei har verkeleg hatt ei strålande turnering og spelt både gode og fantastisk gode kampar. Det veit vi som såg kampane på veg til finalen.

– Energinivået i spelet var ikkje der, men meir avgjerande trur eg var nervene. Jentene hadde veldig høge skuldre før kamp, og det hjelpte ikkje at dei fekk eit baklengsmål. Med det laget og dei pigge beina Stabæk stilte med i finalen hadde vi i grunnen berre éin sjanse for at vi skulle klart det; at eg rettleia jentene riktig undervegs. At eg jagde dei og heldt dei oppe då dei var meir mentalt og fysisk slitne enn nokon gong før. Det gjorde eg ikkje, og eg finn ingen god grunn til at eg ikkje gjorde det, seier hovudtrenar Ørjan Sandal, og tar på seg skylda for finaletapet.

– Vi burde kanskje ha våga meir

Kaptein Thale Strønen Skeie seier fleire spelarar skalv i tunellen før innmarsj til kamp.

– Vi har spelt finalar før, og vi har spelt kampar som har blitt filma, men vi visste at dette var større - finalen i Norway Cup. Så starta kampen, og eg trur vi fekk litt sjokk over kor gode dei var.

Ho fortel om stressnivå og lange, høge ballar, ein måte å spela på som Nore Neset/Os ikkje trener på.

– Eg skulle ønskt at vi våga litt meir, at vi i periodar fekk vist litt kva vi er gode for.Det var skuffande å tapa, sjølv om det var med berre eitt mål, men det var òg skuffande å ikkje føla at du fekk til så mykje.

Mest rørande av alt

Sandal seier 1-0-sigeren over Gjelleråsen i kvartfinalen er den beste kampen jentene gjorde i Oslo i år. Før kampen vinka keeper Anne Noss Nordvik trenaren bort til seg.

– Ho sa ho var heilt øydelagt, frå topp til tå, og at ho kvidde seg enormt til kampen. Vi fekk ein god samtale.

Då kampen blei blåst av og sigeren var i boks kom ho springande rett mot trenaren.

– Ho hadde trassa eigne nerver og halde nullen i nok ein runde. Laget spelte ein fantastisk kamp og vi hadde vunne. Tårene trilla på ho då ho kom springande mot meg for å gje meg ein klem, ho visste at ho hadde gjort ein utruleg kamp. Eg må seia at det er den mest emosjonelle augneblinken eg har hatt på ein fotballbane, seier Ørjan, som rykte opp fem gongar med seniorlaget til Lysekloster.

Klem på klem, siger etter siger. Kaptein Thale fortel litt om kvifor jentene allereie har fått så godt forhold til den nye trenaren sin.

– Han er så flink til å hjelpa éin og éin, til å fortelja kva du er god på, på ein måte som gjer at du trur på han, og til å seia kva du skal jobba med, sånn at du har lyst å utvikla deg vidare.

– No trur eg dei fleste er klare til å legga finaletapet bak seg, eg trur alle erfaringane i Norway Cup gir oss inspirasjon til å bli endå betre. Neste trening er på onsdag og eg gler meg veldig, seier Thale Strønen Skeie.

Fleire saker