- Julaftan kom tidleg i år!

Bildeserie:

1 av 2

Iron Maiden spelar konsert på Koengen i Bergen onsdag 11. august neste år. Dette blei kjent i går, og då Knut sjekka mobiltelefonen sin om morgonen hadde han allereie 17 ubesvarte anrop og like mange tekstmeldingar.

- Det er mange som veit kor mykje eg bryr meg. Dette er stort, jula kom tidleg i år, seier Knut.

Førstkomande fredag startar billettsalet. Også Kjetil Grønvigh fekk veta om konserten per telefon.

- Pappa, som i 1988 tok meg med på min første Maiden-konsert, ringte meg medan eg sto på ein musikkforretning i by´n, fortel Kjetil.

Trommis blei samlar
I 1985 var Knut ein av dei overlevande då ein bil kjørte inn i ein ungdomsgjeng som gjekk på Hetleflåten. Det var med Maiden-musikk legane fekk liv i han igjen, og det var samling av Maiden-effektar som erstatta hobbyen til trommespelaren då han blei lam i beina og delar av høgre overkropp.

- Samling av musikk, filmar og rockeeffektar har blitt livet mitt, og Iron Maiden betyr mest, seier Jacobsen.

Han treng ikkje leita fram effektar frå ei skuffe for at vi skal ta poenget, heile stova er innreia som eit Maiden-museum. Alle albuma er på plass, på cd og vinyl, singlar, samlealbum, filmopptak frå konsertar, pressemapper, plakatar, plekter og trommestikker.

Han har også gull- og platinaplater, og ei masterplate, noko som har kravd sin innsats for å få tak i.

30 til saman
Knut blei Maiden-fan då kameraten Morten Brekke, etter ein tur til Nederland, i 1981 let han høyra «Killers». Maiden-albumet står like høgt i kurs hos Jacobsen i dag.

- Min første Maiden-konsert var i Drammenshallen i 1983, seinare har det blitt mange, seier Knut og sjekkar eit excel-dokument der han har full oversikt.

Drammenshallen igjen i 88 og 90, Oslo Spektrum i 92, Sentrum Scene i 95, Gøteborg i 99, Spektrum i 2000, 2 konsertar i Spektrum i 2003, 2 i Oslo i 2005, Oslo og Vestlandshallen i Åsane i 2006, Trondheim og Oslo i 2008.

Dei to har vore på til saman rundt 30 Maiden-konsertar. Likevel synes dei det er det stort å få dei til Koengen neste år.

- Eg har sett Maiden 13-14 gongar før, ein gong var eg på tre konsertar på tre månadar. Men det blir spesielt å få dei til Bergen og Koengen. Store artistar spelar ikkje kvar som helst, eg ser på heimesida deira at det verkar som om dei synes det er stas at dei skal spela i midt i byen og «i ei borg frå middelalderen», seier Kjetil.

Backstage
I 1990 var Knut med i ein konkurranse i ungdomsmagasinet Topp. Førstepremien var å møta Iron Maiden før konserten i Drammenshallen.

- Eg var eigentleg ikkje vinnaren, men eg fortalte redaksjonen om kor stor fan eg var og la til at eg ikkje rekna med å vinna. Eg sit ikkje i rullestol fordi eg er heldig.

Knut fekk møta bandmedlemmane, noko han også har fått gjera fleire gongar.

- Nokon gongar ved slump, at eg har møtt ein av dei på ein pub før eller etter konserten, andre gongar har eg møtt dei etter litt research. Eg har fått ein del kontaktar i bransjen og får av og til tips om kvar dei held seg.

Kjetil har også vore backstage, i Vestlandshallen i 2006. Der fekk han stadfesta mistanken om at mange som møter artistane ikkje har noko backstage å gjera.

- Norske C-kjendisar med null interesse for rock går og svimer rundt utan å ha noko å snakka med bandet om. Men slik kjem det vel alltid til å bli. Om vi kjem oss backstage eller ikkje på Koengen betyr ikkje så mykje, vi vil først og fremst nyta konserten, seier Grønvigh.