Just Olsen takkar av

Etter 12 år som dagleg leiar har Erik Just Olsen sagt opp stillinga si i Bjørnefjorden Golfklubb.

Kjetil Vasby Bruarøytorsdag 10. mars 2011 06:28

Som spelande trenar for Os fekk han på 70-talet A-laget opp i øvste divisjon på tre år. Den tidlegare landslagsspelaren i fotball, som dei siste 12 åra har vore dagleg leiar ved Bjørnefjorden Golfklubb, har no sagt opp stillinga si.

- Det er ingen dramatikk i dette, eg er berre litt sliten, seier Just Olsen, som fyller 65 år no i mars.

Styret seier dei har forståing og respekt for at den driftige og hyggelege sjefen takkar av etter mange år med iherdig innsats for klubben.

Bjørnefjorden Golfklubb, som blei stifta i 1994, starta med 30 medlemmar. Etter bygging av treningsfelt og seksholsbane blei låven i 1998 opna som klubbhus med proshop, i 1999 opna 9-holsbanen som i fleire omgangar har blitt oppgradert.

- Ein golfbane blir aldri ferdig, sa Erik til Midtsiden.no før nyopninga i 2009.

Styret i Bjørnefjorden Golfklubb vil førebels overta den daglege driftasaman med dei andre tilsette i klubben, som no har rundt 900 medlemmar. Samstundes jobbar dei for fullt med å førebu anlegget på sesongstart.

Erik Just Olsen jobbar ut den tre månadar lange oppseiingstida si.