Kan få kraftige bøter
Mange blanda seg inn i politiet sitt arbeid natt til søndag. - Dei risikerer solid bøtelegging for å forstyrra patrulja på jobb, seier Terje Sperrevik.
Natt til søndag blei politiet tilkalt til Irish Cat i samband med ein gjest som skapte problem og bråka med vaktane på utestaden.
- Han var tross alt såpass fornuftig at han roa seg kraftig ned då patrulja kom på staden.
- Men det var såpass amper stemning på staden at vi valde å vera til stades litt utover, fortel politioverbetjent Terje Sperrevik.
Mellomanna måtte dei hjelpe til då ein av gjestane ramla ned trappa og skada seg.
- Ambulansen blei tilkalt og tok hand om den skadde, men det var det litt for mange andre som blanda seg inn òg.
Kraftige reaksjonar
Sperrevik fortel at dei stadig opplever festdeltakarar som blandar seg inn både i politiet og ambulansetenesta sitt arbeid.
- Dette er noko vi ikkje tolererer og som vi vil slå kraftig ned på med solide bøter.
- Folk må vera klar over at ei slik innblanding kan få konsekvenser ved at det hamnar på rullebladet deira i tillegg til at det svir godt i pengepungen.
I dei grøvste tilfella kan også fengsling vera ein reaksjonsform. Ei bøtlegging for å forstyrre redningsetatane i arbeidet kostar for fleire tusen kroner.
- Eg kan ikkje gje deg eksakte summar, men til samanligning kan det å knuse ei ølflaske kosta 3-4000 kroner.
- Her snakkar vi om strengere reaksjonar enn det, avsluttar Sperrevik som anmodar folk om å la kollegaene både i politiet og dei andre redningstenestene få arbeida i fred.